Nga Boldnews.al
Më shumë se shkarkimi nga detyra e kreut të Emergjencave Civile Shemsi Prençi bujë të madhe bën emri që do e zëvendësojë atë. Që nga dita e sotme, ish-drejtori i Përgjithshëm i Policisë së Shtetit Haki Çako do të drejtoje emergjencat civile. Pas pesë muajsh “pushime”, Çakos i është ofruar posti i rëndësishëm, duke lënë të kuptohet qartë se kryeministri Edi Rama e kishte të preferuarin e tij dhe kur hodhi firmën për ta shkarkuar si kryepolic, u detyrua nga të tjerët, veçanërisht nga presioni ndërkombëtar.
Me ardhjen në krye të ministrisë së Brendshme të Fatmir Xhafajt, raportet e tij me Çakon kanë qenë gjithnjë të ftohta dhe nuk vonoi dita kur ministri i kërkoi Ramës të firmoste largimin e tij. Për disa muaj kreu qeverisë hezitoi, por më pas u detyrua të lironte nga detyra kryepolicin, që në fakt ishte i fundit i “epokës Tahiri”.
Çako erdhi me një “CV” të pasur në karrierë, ku merita më e madhe ishte ndërhyrja e policisë në Lazarat, pasi në atë kohë drejtonte Policinë e Gjirokastrës. Kaq mjaftoi që të niste ngjitjen në karrierë, duke përfituar edhe nga dorëheqja e ish-kryepolicit Artan Didi u katapultua në postin më të lartë policor. Ishte kohë kur ministri Saimir Tahiri kontrollonte çdo “pëllëmbë drogë” në vend, duke u futur në vitin e rekordeve të mëdha 2016, me kanabizimin masiv të shqipërisë.
Ndonëse zërat pranë Çakos komentonin se ai ishte i pafuqishëm të kundërshtonte ministrin Tahiri dhe pesë pesë drejtorë të policisë së qarqeve që kontrollonin kultivimin dhe trafikimin e kanabisit, përsëri Çako mban përgjegjësi morale për dëmin e madh që iu shkaktua vendit nga kultivimi i drogës dhe përfshirja e zyrtarëve të lartë të policisë në trafiqe. Por Çako me urtësinë e tij, që “nuk prishte punë”, tentoi të qëndronte ende në detyrë pavarësisht se ministri i ri Fatmir Xhafaj nuk e kishte në planet e tij. Ultimatumi që i dha Fatmir Xhafaj për largimin e Çakos detyroi kreun e qeverisë të kryente lëvizjen e madhe, por pas vetëm pesë muajsh Çakos i ofron një post të rëndësishëm dhe këtë herë “firmëtarja” e detyrës së re të ish-kryepolicit është Ministrja e Mbrojtjes Olta Xhaçka.
