Sot është ndoshta ndeshja më e vështirë për skuadrën gjermane. Sfida me Suedinë është jetike për skuadrën e trajnerit Lëv që do të luajë vetëm për një objektiv, tri pikët. Ishte një javë e trazuar ajo që shoqëroi skuadrën pas humbjes me Meksikën në start. Shumë pak e kishin menduar që tani do të flitej për një eliminim të parakohshëm të kampionëve të botës që në fazën e grupeve.
Por realiteti është ndryshe për skuadrën dhe tifozët e tyre. “Çdo ndeshje është një finale nga tani”, u shpreh para dy ditësh sulmuesi Mario Gomez. Ai ka qenë sot sërish në konferencë për shtyp në krah të trajnerit Joakim Lëv. Gomez u shpreh kështu kur reagoi për atmosferën në skuadër: “Tani skuadra duket me e qetë se para disa ditësh. Na u desh pak kohë për të tretur humbjen me Meksikën. Pasi e analizuam takimin, kuptuam gabimet tona dhe tani po mendojmë vetëm për ndeshjen e radhës ndaj Suedisë”. Nëse do të jetë në formacionin e parë me nordikët, sulmuesi tha: “Ardhja në konferencë mund të jetë një sinjal i mirë. Por mund të jetë edhe një blof. Është si të luaj ruletë, shanset janë 50 me 50. Unë nuk e di në do të jem në formacionin e parë, kjo i takon trajnerit për ta vendosur”.
Ndryshimet në fomacion
Gomez është përfolur të zëvendësojë Vernerin në sulm nga minuta e parë. Së bashku me të është edhe Marko Rojs një kandidat i mundshëm për të luajtur në vend të Drakslerit ose Ozilit. Ky i fundit zhvilloi një paraqitje të dobët ndaj meksikanëve dhe për këtë është vënë nën akuzë nga analistët e shumtë. Në krahun e majtë të mbrojtjes, trajneri Lev do të aktivizojë Jonas Hektor në vend të Platenhard.
Sami Khedira është një tjetër lojtar që rrezikon të lihet në stol. Në vend të tij mund të luajë Ikai Gyndoan ose Gorecka. Të rikthehemi të Mario Gomez që foli dhe për taktikën, me të cilën do të luajë skuadra kundër një kundërshtari të fortë në mbrojtje. “Skuadrat ndryshojnë nga njëra ndeshje në tjetrën në varësi të kundërshtarit. Ne nuk luajtëm ashtu siç donim të luanim, pasi nuk e prisnim që Meksika të luante në atë mënyrë. Suedezët janë një kundërshtar i njohur për ne. Në mbrojtje janë shumë mirë, por nesër mund të zgjedhin të luajnë ndryshe”.
Botërori i surprizave
“Po të shohim ecurinë në Botëror të skuadrave të ashtuquajtur të vogla, nuk ka qenë ashtu siç e kishim parashikuar. Skuadrat e mëdha që kanë në përbërje lojtarë shumë të mirë kanë hasur vështirësi me ato që nuk i kanë. Por nesër (sot) nuk do të ketë surpriza. Ne do të fitojmë pasi do ta kërkojmë më shumë këtë fitore se kundërshtari”, përfundoi Gomez. Për të do të jetë Botërori i fundit me “Pancerat”, pas turneut ai do të largohet përfundimisht nga skuadra.
