Një zjarr i përmasave të mëdha ka përfshirë një banesë në fshatin Stan Karbunarë të Bashkisë Lushnjë, duke shkaktuar dëme të shumta materiale.
Flakët janë përhapur me shpejtësi, favorizuar edhe nga temperaturat e larta, duke përfshirë të gjithë godinën.
Si pasojë e zjarrit janë shkatërruar plotësisht orenditë e brendshme të shtëpisë, ndërsa është djegur edhe çatia e banesës.
Fatmirësisht, në momentin kur ka rënë zjarri, banesa ka qenë bosh dhe nuk raportohet për persona të lënduar. Familjarët që kujdeseshin për shtëpinë nuk ndodheshin aty, ndërsa pronari i banesës jeton jashtë vendit.
Nga hetimet paraprake dyshohet se shkak i zjarrit mund të ketë qenë një shkëndijë elektrike, ndërsa ekspertët vijojnë punën për të përcaktuar rrethanat e plota të ngjarjes.
