Deputetja e Partisë Demokratike, Jorida Tabaku, ka reaguar për situatën e pensioneve në Shqipëri, duke theksuar se rritja ekonomike e propaganduar nga qeveria nuk po shkon te qytetarët, por po përqendrohet te një pakicë e privilegjuar
Sipas Tabakut, pensionistët janë prova më e qartë se ekonomia shqiptare nuk po prodhon mirëqenie për shumicën.
Qeveria pretendon se nga viti 2021 deri në vitin 2025 ekonomia është zgjeruar me mbi 24%. Por gjatë së njëjtës periudhë pensionet nuk kanë ndjekur rritjen ekonomike, ndërsa çmimet dhe kostot e jetesës janë rritur vazhdimisht.
Për Tabakun, këto shifra tregojnë se rritja ekonomike nuk po përkthehet në pensione më të larta, në më shumë siguri apo në një jetë më dinjitoze për të moshuarit.
Përkundrazi, ndërsa ekonomia rritet në statistikat e qeverisë, pensionistët humbasin fuqinë blerëse dhe detyrohen të luftojnë çdo muaj vetëm për mbijetesë.
Sipas deputetes demokrate, ky është rezultati i një sistemi që u merr shumicës për të mbrojtur pakicën. Një sistem ku fondet, privilegjet dhe përfitimet ekonomike përqendrohen te një grup i vogël, ndërsa pensionistëve u ofrohen indeksime minimale, të paraqitura si dhurata të qeverisë.
DEKLARATA E PLOTE:
Sistemi i dështuar që punon për pakicën!
Qeveria përpiqet çdo ditë t’u mbushë mendjen shqiptarëve se ekonomia po ecën mirë. Por pyetja është e thjeshtë: kush përfiton nga kjo rritje ekonomike?
Qeveria pretendon se nga viti 2021 deri në vitin 2025 ekonomia shqiptare është zgjeruar me mbi 24%. Por sa janë rritur pensionet gjatë këtyre katër viteve? Sa ka ndryshuar jeta e pensionistëve, përtej indeksimeve të vogla që paraqiten si dhurata të qeverisë?
E vërteta është krejt tjetër.
Sot, 27% e popullsisë në moshë pensioni po shtyhet drejt kufirit të varfërisë ekstreme.
Pensioni mesatar i pensionistëve të rinj vitin e kaluar ra në vetëm 16 mijë lekë, rreth 3% më pak se pensioni i atyre që dolën në pension në vitin 2024.
Ndërkohë, rreth 55% e 641 mijë pensionistëve trajtohen me pension të pjesshëm, me një pagesë mesatare prej vetëm 13,500 lekësh në muaj.
Pra, ekonomia mund të rritet në letrat e qeverisë, por pensionet bien, çmimet rriten dhe familjet varfërohen.
Ky nuk është thjesht një sistem i padrejtë. Është një sistem që u merr shumicës për të mbrojtur pakicën.
Një sistem që ka dëmtuar familjen shqiptare, ka zhvlerësuar punën e një jete dhe i ka kthyer pensionistët në qytetarë që luftojnë çdo muaj vetëm për të mbijetuar.
Prandaj kjo shumicë e mbron me çdo kusht këtë sistem: sepse nuk punon për shqiptarët, por për pakicën që përfiton prej tij.
