Seanca paraprake në GJKKO për dosjen ndaj Metës dhe Monika Kryemadhit u shoqërua me kundërshtime të forta nga mbrojtja e kësaj të fundit, e cila kërkoi shpalljen të pavlefshme dhe të papërdorshme të një pjese të provave të administruara nga SPAK.
Avokatët e ish-deputetes kundërshtuan në veçanti provat e nxjerra nga celulari i sekuestruar gjatë kontrollit në banesën ku jetonte Kryemadhi, duke argumentuar se procedura e ndjekur nga organi i akuzës ka qenë në kundërshtim me ligjin.
Avokati Redi Llanaj deklaroi se SPAK ka ndryshuar qëndrim lidhur me akuzat për korrupsion, ndërsa pretendoi se marrëdhëniet miqësore të klientes së tij janë interpretuar si marrëdhënie korruptive.
Edhe vetë Kryemadhi ka pretenduar se sekuestrimi i telefonit është kryer në kundërshtim me ligjin, duke argumentuar se në kohën e marrjes së pajisjes ajo ushtronte mandatin e deputetes.
Sipas saj, provat e siguruara në shkelje të procedurave ligjore nuk mund të përdoren në procesin gjyqësor dhe duhet të shpallen të papërdorshme.
“Celulari është sekuestruar në mënyrë të paligjshme. Në atë periudhë kam qenë deputete dhe marrja e një prove në mënyrë të paligjshme e bën atë të papërdorshme”, mësohet të ketë deklaruar Kryemadhi para trupit gjykues.
Gjykata pritet të shqyrtojë kërkesën dhe të vendosë nëse të dhënat e nxjerra nga telefoni do të pranohen ose jo si prova në procesin penal.
