Prokuroria e Beratit ka përfunduar hetimet dhe ka dërguar për gjykim tre persona, dy të akuzuar për shfrytëzim prostitucioni dhe një tjetër të akuzuar për moskallëzim krimit.
Sipas hetimeve, rezulton se shtetasit R.L. dhe E.V dyshohet se kanë bashkëpunuar për të shfrytëzuar për prostitucion një grua, Y.Sh.
R.L., i cili bashkëjetonte me të, e ka shtyrë atë të kryente prostitucion për shkak të vështirësive ekonomike dhe ka organizuar klientë, ka përcaktuar vendet ku zhvillohej aktiviteti dhe ka përfituar të ardhura prej tij.
Nga ana tjetër, E.V., pronar i një lokali nate në Berat, dyshohet se e ka punësuar fillimisht si balerinë, por më pas ka ndihmuar në sigurimin e klientëve për shfrytëzim seksual brenda ambienteve të lokalit të tij.
Ndërkohë, shtetasi K.D. akuzohet se ka qenë në dijeni të veprimtarisë kriminale, por nuk e ka kallëzuar atë tek autoritetet.
“Nga deklarimi i kësaj shtetase rezultoi se ajo ka ushtruar prostitucion dhe bashkëjetuesi i saj, R.L., ka pasur dijeni pasi ai i merrte lekët e përfituara nga veprimtaria kriminale kur kjo shkonte në shtëpinë që bashkëjetonin. Ajo ka sqaruar se klientët ia siguronte shtetasi E.V., i cili ishte pronar i lokalit të natës “Star”, ku ishte e punësuar si balerinë.
I pandehurit R.L., pranoi se e ka shtyrë bashkëjetuesen e tij të ofronte shërbime seksuale për shkak të gjendjes së vështirë ekonomike. Me raste e ka ndihmuar për t’i gjetur ndonjë klient për të kryer marrëdhënie seksuale kundrejt pagesës.”, njoftoi Prokuroria.
