Trukimet e ndeshjeve në kampionatin e Kategorisë së Parë në futbollin shqiptar ka bërë Komisionin e etikës që të nisë hetimet.
Për herë të parë këtë vit, Etika është mbledhur për të diskutuar rreth kampionatit të Kategorisë së Parë.
Në orën 11:30, në ambientet e FSHFsë, anëtarët e komisionit: Fatmir Braka, Bejkush Birçe, Agron Kuliçaj, Ardian Leka dhe Bashkim Koka, të shoqëruar nga sekretari i Përgjithshëm i federatës, Ilir Shulku, fillimisht kanë nisur mbledhjen me zgjedhjen e kryetarit dhe zv.kryetarit të Etikës. Pesë anëtarët ishin në një mendje, duke rizgjedhur si kryetar avokatin e njohur, Braka, si dhe zv.kryetar ishtrajnerin e Kombëtares, Bejkush Birçe. Pas këtij procesi formal, mbledhja ka vijuar me shqyrtimin e problematikës që ka shoqëruar kampionatin e Kategorisë së Parë në javët e fundit.
Shulku ka vendosur në dijeni anëtarët për gjithçka ka ndodhur dhe pas diskutimeve është rënë dakord që në mbledhjen e radhës, e cila u la për datën 28 prill, të shqyrtohet hollësisht i gjithë materiali. Bëhet fjalë për të gjitha akuzat që përfaqësuesit e klubeve të Kategorisë së Parë kanë ngritur për ndeshjet e dyshuara si të trukuara në javën e kaluar. Deklaratat e lojtarëve, por edhe trajnerëve për shitblerje ndeshjesh, apo akuzave të ngritura për tentativa të klubeve për ryshfet ndaj futbollistëve dhe arbitrave do të merren parasysh, duke u investiguar nga Komisioni i Etikës. Hetimi Burime të sigurta të gazetës kanë bërë të ditur se Etika ka kërkuar nga sektori i garave në FSHF që t’i vendosë në dispozicion të gjitha deklaratat e dhëna nga drejtues, lojtarë apo trajnerë gjatë javës së kaluar në “Panorama Sport”.
Gjithashtu, Komisioni do të njihet edhe me një videoakuzë, që është dërguar në institucionin e futbollit nga klubi i Luftëtarit. Gjatë ndeshjes TurbinaLuftëtari 01, luajtur të mërkurën e kaluar, gjirokastritët kanë filmuar duke qëndruar në dhomën e arbitrave drejtorin sportiv të Sopotit, Nesti Binishi. Ky i fundit nuk kishte lidhje me atë takim dhe për më tepër që ishte në një vend ku kategorikisht nuk i lejohej të qëndronte. Nga këtu nisën edhe akuzat, që futën në “lojë” shumë klube të së Parës. Presidentë që flisnin hapur për lënie ndeshjesh, por edhe lojtarë që akuzonin arbitrat se kanë marrë para.
Gjithsesi, tashmë çdo gjë është në dorën e Etikës dhe mbetet për t’u parë nëse ata që kanë ngritur akuzat do ta konfirmojnë një gjë të tillë edhe kur të thirren si dëshmitarë. Këtë herë Kategoria e Parë ka prodhuar një skandal të vërtetë dhe Etika ka në dorë fakte që duken të pakundërshtueshme dhe të thëna nga vetë “aktorët”. Hapi i parë i komisionit është shqyrtimi i të gjitha materialeve, por për të arritur te vendimet, duket se duhet pritur disa javë, ndoshta edhe muaj. Në mbledhjen e radhës Komisioni do të vendosë për dëgjimin e atyre që kanë ngritur akuzat, por gjithashtu edhe zyrtarëve të ndeshjeve që dyshohet se janë trukuar.
