Gazetari Artan Hoxha ka hedhur akuza të forta mbi përmasat e qarkullimit të parasë informale në Shqipëri, duke deklaruar se vetëm gjatë vitit të zgjedhjeve lokale të vitit 2023 janë këmbyer rreth 12 miliardë euro në pikat e këmbimit valutor në vend.
I ftuar në emisionin “Çim Peka LIVE” në SYRI TV, ai thotë se fenomeni i rënies së fortë të euros në tregun shqiptar dhe luhatjet e pazakonta të kursit të këmbimit lidhen drejtpërdrejt me këtë qarkullim masiv të parasë informale jashtë sistemit bankar, që janë para droge.
Ai solli në vëmendje edhe deklarime të mëparshme publike nga ish-ministri Arben Ahmetaj, duke deklaruar se deklaratat e tij janë vërtetuar nga zhvillimet dhe nga realiteti ekonomik e politik në vend.
Hoxha ngriti gjithashtu pikëpyetje mbi lidhjen mes qarkullimit të madh të parasë, investimeve në resorte luksoze dhe vendimmarrjeve shtetërore për lejet e ndërtimit, duke lënë të kuptohet se infrastruktura ligjore dhe institucionale ka krijuar hapësira për pastrim parash në shkallë të gjerë.
“Ato që thoshte Arben Ahmetaj, madje më cilësonin të çmendur, dhe u deshën vite që të provohen që ato ishin të vërteta. Unë i merrja të besueshme, pse?
Sepse e dija që Ahmetaj ka qenë atje në tavolinë. Dhe e dimë, edhe kur thoshte për shishen e verës. Po, se pi një verë atë. Po të ishte një njeri tjetër që pi raki, s’do e besoja. Po Arben Ahmetaj i njeh verat, cilësinë e tyre dhe çmimin e tyre.
Dhe ju e patë çfarë ndodhi këtu. Më shumë u shqetësuan për të hequr etiketat e verave atje, se do provonte ajo që thoshte Ahmetaj, që është pirë shishe vere ‘Rothschild’ me 33 mijë euro shishja.
Pra, gjithë natën ata hoqën etiketat atje, morën verat e shtrenjta, i lanë ato të tjerat pastaj që pi gjithë dynjaja. Por kjo shishe e verës, në pamje të parë duket sikur është një gjë e lehtë, 33 mijë euroshi.
Por kur një zyrtar i shtetit pi një verë 33 mijë euro, a e kupton çfarë impakti ka në mediat ndërkombëtare, tek politikanët evropianë? Pra, ata mund të të lejojnë disa gjëra të tjera, por këtë pjesë aty nuk të falin, sepse janë detaje që ngjisin dhe ngelen aty.
Dhe pastaj kur vinte pjesa çfarë është në Aruba në 2019-ën, pastaj në Monako në 2021-shin, pastaj në Majorka dhe me radhë. Dhe ti i gjen sot në resorte të ngritura në bregdetin shqiptar, atëherë s’ke nevojë më për provë.
Prova është ai resort që duket nga hëna. Kaq e thjeshtë është. Çfarë prove kërkon më? Këta po flasin për këtë resortin. A është ngritur ky resorti mbrapa? A është ndërtuar? Po, ka mbaruar filmi. Pra, kjo është zbatuar. Si është ndërtuar resorti? Mbi leje që i ka miratuar qeveria shqiptare.
Madje për ndërtimet është ekskluzivitet i kryeministrit. Po kaluan mbi 9 kate, firmos kryeministri. Pra, çdo gjë, infrastruktura që të ndërtoheshin paratë, nëse ata mund ta tregtojnë drogën, e tregtojnë atë kokainën.
Por nëse ti si shtet ua bën të pamundur atyre të hyjnë këtu, ata do të shkojnë në vende të tjera, nuk të rrezikojnë ty. Dhe fakti që ata arritën në Shqipëri të ishin kaq determinues, kaq të rëndësishëm në ekonominë shqiptare, saqë ne nuk shpjegojmë dot. Kur është bërë takimi në Aruba, sa ka qenë euro në Shqipëri?
Pra 1 euro shkëmbehej me 1320 lekë. Sa është euro sot se e pashë para se të vija në emision. Është 94 sot. Pra, edhe ne nuk shpjegonim dot si shkoi euro në gropë.
Që nga aty ka filluar një dishezë e madhe. Dhe unë po them vetëm në vitin 2023, se do t’ia lë radhën të tjerëve, vetëm në vitin 2023, (vitin e zgjedhjeve për bashkitë në Shqipëri), jashtë sistemit bankar, në pikat e këmbimit valutor në Shqipëri, janë këmbyer 12 miliardë euro. E kupton? Sado që mundohet Banka Qendrore të blejë në treg e të ndërhyjë në treg, pse euro është atje ku është. 12 miliardë në të gjithë pikat e këmbimit valutor që ka Shqipëria’, u shpreh Hoxha.
