Sulmuesi meksikan Javier Hernandez i njohur ndryshe si “Chicharito”, pasi dha asistin në golin e fitores të shënuar nga Lozano ndaj Gjermanisë, zbuloi se qëllimi i kësaj skuadre është të luajë në finalen e Kupës së Botës, por në të njëjtën kohë ai theksoi se ndeshjet duhet të merren hap pas hapi. Ish-ylli i Man United e pranon se suksesi kundër kampionëve në fuqi të botës është një fitore shumë e rëndësishme, e cila duhet shijuar. “Kjo fitore është e jashtëzakonshme, por nuk vlen asgjë nëse nuk fitojmë kundër Suedisë dhe Koresë. Duhet të shohim se çfarë kemi bërë mirë, të mbajmë këtë ritëm dhe të korrigjojmë gabimet”, tha ish-sulmuesi i Real Madridit, tani në radhët e West Ham në Premier League. “Nuk duhet të themi se Gjermania ishte rivali i grupit për t’u mundur, sepse Suedia dhe Korea mund të kenë të njëjtën shkallë vështirësish ose më shumë”, tha “Chicharito”, duke lënë të kuptohet se më e vështira sapo ka filluar.
Një tjetër sulmues i ekipit kombëtar meksikan, Raul Jiménez, u shpreh se ata u treguan cinikë duke qëndruar stoikë në mbrojtje dhe agresivë në sulm: “Sot Meksika ishte e ngurtë dhe shfrytëzoi mundësitë që iu ofruan në sulm. Në Kupën e Botës së kaluar ne kemi ‘lidhur’ Brazilin, por ishte vetëm një barazim dhe ndoshta kjo është fitorja më e madhe që kam pasur ndonjëherë për të jetuar. Kjo fitore është festuar në mënyrën më të mirë”, përfundoi sulmuesi i ri i Wolverhampton Wanderers F.C. Meksika ndodhet në Grupin F dhe me këtë fitore qëndron në krye me tre pikë duke u afruar edhe më shumë me objektivin. Gjithsesi Suedia është një kundërshtar tepër i fortë që shihet si një favorite për të kaluar më tej dhe meksikanët nuk do ta kenë aspak të lehtë, teksa kundërshtari tjetër është Koreja e Jugut.
