Faza e ndeshjeve të para të grupeve do t’i japë mundësinë Belgjikës që të hedhë në fushë talentet e saj në Soçi. Përballë do të jetë skuadra e një tjetër kontinenti, Panamaja e Amerikës Qendrore, e cila do të shihet si pasqyra e belgëve në “Rusi 2018”. Një ndeshje ku përballë janë skuadra të dy stileve të ndryshme. Belgët vijnë në startin e kompeticionit pa Januzajn në formacion dhe pa Vinsent Kompani.
Ky i fundit, siç ka deklaruar edhe vetë trajneri Martinez, pritet që të jetë i gatshëm vetëm për ndeshjen e tretë të fazës së grupeve për shkak të dëmtimit.
FORMA – Të besuarit e Roberto Martine do të kërkojnë që të shfrytëzojnë paraqitjet e mira që kanë bërë në miqësoret e fundit, në të cilat kanë treguar se mund të kenë diçka më shumë se katër vite më parë: Maturinë. Eksperienca e fituar në “Brazil 2014” është një armë e shtuar për Belgjikën në këtë kompeticion dhe në sfidat e Grupit G do të tentojë që të tregojë supremaci.
Sa i përket Panamasë, për ta është një festë pjesëmarrja në Rusi, pasi është hera e parë që marrin pjesë në fazën finale të një Botërori. Megjithatë, do të bëjnë maksimumin që t’ia vështirësojnë “jetën” në start Belgjikës.
Humbja 4-1 në miqësoren e fundit e detyron Kosta Rikën që të jetë më e kujdesshme në prapavijë për të shmangur një disfatë katastrofike në Botëror. Belgjika do të mundohet që të shfrytëzojë treshen e avancuar, ku Hazard dhe Mertens do të vihen në mbështetje të Romelu Lukakut.
Në prapavijë pritet një mbrojtje e vendosur me tre. Për Panamanë, ndeshja e parë në një kompeticion të tillë kërkon më së paku disiplinë të hekurt taktike dhe një prapavijë që duhet të përballojë forcën e sulmuesve të Belgjikës.
