Florida është bërë shteti i parë në SHBA që ngre padi kundër OpenAI dhe drejtorit ekzekutiv të kompanisë, Sam Altman, duke i akuzuar për keqinformim lidhur me sigurinë e platformës ChatGPT.
Padia u dorëzua nga Prokurori i Përgjithshëm i Floridës, James Uthmeier, i cili pretendon se kompania ka minimizuar rreziqet e mundshme të inteligjencës artificiale për përdoruesit e rinj. Sipas autoriteteve, ChatGPT dyshohet se ka ekspozuar të miturit ndaj përmbajtjeve të rrezikshme, përfshirë informacione të lidhura me dhunën, vetëlëndimin dhe sjellje që mund të krijojnë varësi.
Në padi përmenden disa incidente të ndodhura në SHBA, mes tyre edhe një rast i të shtënave në një universitet në Tallahassee, ku pretendohet se autori kishte përdorur ChatGPT për të marrë informacione para ngjarjes.
Gjatë një konference për shtyp, Uthmeier deklaroi se Altman është përfshirë personalisht në procesin gjyqësor për shkak të rolit të tij qendror në promovimin e funksioneve të platformës, të cilat sipas shtetit kanë kontribuar në rreziqet e pretenduara.
