Mesfushori i Lazio, Milinkovic-Savic është ndër lojtarët më të kërkuar në merkaton e verës, pasi skuadrat më të mëdha në Europë e kërkojnë 23-vjeçarin, që me shumë gjasa do të ketë një ekip të ri sezonin tjetër. Madje përflitet se transferimi i tij mund të kapë shifrën e 100 milionë eurove, duke bërë që konkurrenca të jetë e fortë.
Por babai i tij, Nikola, i jep një këshillë lojtarit, që të vazhdojë të luajë në Serinë A. “Ia kam thënë disa herë që të luajë me bardhezinjtë, pasi është skuadra ideale për të. Bëhet fjalë për një klub të madh, që dominon në Itali dhe është pretendent në Europë”, tha babai i Milinkovic-Savic.
Më tej, babai Nikola shton: “Sergej e njeh mirë kampionatin italian, gjuhën dhe është integruar mirë në këtë botë. Te Juventusi do të luante me kampionë si Dybala, Douglas Costa etj. Me Juventusin ai mund të synojë të fitojë edh eTopin e Artë, pasi do të ishte gjithnjë në një ekip pretendent për të fituar kudo ku luan”.
Por duket se zemra e çon lojtarin te skuadra e Real Madrid, për të cilin ai bën tifo që i vogël, duke qenë se ka lindur në Spanjë. “Mund të shkojë në Spanjë pas 2-3 sezonesh, pasi të jetë pjekur edhe më shumë si futbollist, ashtu sikurse bëri edhe Zidane. Gjithsesi, do të jetë Sergej ai që do të bëjë zgjedhjen”, tha Nikola.
