Gjykata e Posaçme e Shkallës së Parë për Korrupsionin dhe Krimin e Organizuar ka shpallur të pafajshëm Sali Berishën, deputetët Flamur Noka, Edi Paloka dhe Luciano Boçi në çështjen penale të “Shpifjes”, të ngritur nga ish-avokatja dhe hetuesja Valentina Teodoresku.
Teodoresku është avokatja, që e caktuar kryesisht nga gjykata, përfaqësoi Berishën në seancën e 26 tetorit 2023, ku u konfirmuan masat e para “detyrim për paraqitje” dhe “ndalim të daljes jashtë shtetit” ndaj tij në lidhje me dosjen “Partizani”.
Çështja lidhet me kalimin e Teodoreskut nga marrëdhënia avokat-klient me Berishën në palën kundërshtare, një ndryshim që ndodhi pak ditë pas seancës së tetorit. Emri i saj ishte përmendur në media dhe rrjete sociale si ish-hetuese e diktaturës, gjë që ngriti debate rreth motiveve të saj në padi.
Në kërkesën e ngritur më 26.06.2025, Teodoresku kishte akuzuar Berishën, deputetët Noka, Paloka dhe Boçi, si dhe disa media, gazetarë dhe avokatin Genci Gjokutaj, për shpifje të kryer botërisht.
Gjykata vendosi gjithashtu që shpenzimet gjyqësore të mbeten siç janë bërë.
