Pagat e trajnerëve të ekipit kombëtar shqiptar kanë njohur rritje të ndjeshme ndër vite, duke e kthyer pankinën kuqezi në një nga postet më të kushtueshme në sportin shqiptar.
Me ardhjen e trajnerit të ri, Rolando Maran, FSHF duket se ka zgjedhur një formulë më të balancuar financiare. Sipas Top Channel, marrëveshja me teknikun italian dhe stafin e tij arrin në rreth 400 mijë euro në vit.
Kjo shumë përkthehet në afro 33 mijë euro në muaj ose rreth 1 mijë euro në ditë për stafin teknik të Kombëtares, duke treguar peshën financiare që ka sot drejtimi i ekipit përfaqësues.
Rritja e investimeve për trajnerët nisi në periudhën e Gianni De Biasi, i cili fillimisht firmosi me një pagë rreth 300 mijë euro në vit. Pas suksesit historik me kualifikimin në Euro 2016, kontrata e tij u përmirësua me rreth 15 për qind.
Më pas, Christian Panucci dhe Edy Reja ruajtën të njëjtin standard financiar, me paga që llogariteshin rreth 400 mijë euro në vit bashkë me stafet respektive, një nivel që tashmë duket se është kthyer në normën e zakonshme për pankinën kuqezi.
