Në kohën kur vëmendja e botës sot ishte përqëndruar tek takimi i Donald Trumpit me Xi Jinping në Pekin, Kremlini doli me njoftimin se papritur e Kinën do ta vizitojë shumë shpejt edhe presidenti rus Vladimir.
Nuk është dhënë asnjë datë për vizitën, por zëdhënësi Dmitry Peskov, u shpreh se të gjitha përgatitjet janë përfunduar. Vizita e fundit e Putinit në Kinë ishte në shtator të vitit 2025, kur ai mori pjesë në paradën madhështore ushtarake të organizuar në kryeqytetin kinez, si dhe në një samit të nivelit të lartë.
Analistët politikë kujtojnë se Kina është kthyer në partnerin më të fuqishëm ndërkombëtar të Rusisë duke ofruar mbështetje ekonomike dhe diplomatike në një periudhë sanksionesh perëndimore dhe izolimi. Bashkëpunimi mes dy vendeve është zgjeruar ndjeshëm që nga viti 2022, duke përfshirë energjinë, tregtinë, bankat, teknologjinë dhe koordinimin ushtarak.
Vetë Putin dhe Xi Jinping, kanë zhvilluar një nga marrëdhëniet më të afërta personale midis liderëve botërorë, duke u takuar mbi 40 herë. Partneriteti i tyre i shpallursi “pa kufij” synon thellimin e bashkëpunimit strategjik, edhe pse nuk është një aleancë ushtarake formale. Ekspertët presin që gjatë vizitës të diskutohet lufta në Ukrainë, mbështetja ekonomike dhe diplomatike, si dhe bashkëpunimi në fushën e energjisë dhe teknologjisë.
Fakti që vizita vjen në një kohë kur Trump gjithashtu viziton Kinën, po përshkruhet si një moment i pazakontë diplomatic, në të cilin Pekinit i duhet të ruajë ekuilibrat mes Moskës dhe Uashingtonit.
