Gjykata e Tiranës ka shpallur ditën e sotme (5 maj) të pafajshëm Aulon Kalanë i cili ishte paditur për shpifje nga Kryetari i Bashkisë Tiranë, Erion Veliaj.
Në një deklaratë për gazetarët, Kalaja tha se u shpall i pafajshëm pas 17 seancash.
“Gjykata e Tiranës, Dhoma Penale, më shpalli të pafajshëm, në gjyqin ku Kryetari i Bashkisë Tiranë, Erion Veliaj, më paditi për shpifje.
Pas 17 seancash dhe një gjyqi që nisi në muajin tetor 2025, sot me 5 maj 2026, unë shpallem i pafajshëm!
Falenderoj ekipin tim ligjor, që tregoi nivel të lartë profesional, me në krye avokatin Alban Alimema.
Faleminderit dhe ju, që më mbështetët dhe besuat në integritetin tim moral dhe profesional.”- tha Kalaja.
Kujtojmë se Aulon Kalaja ishte paditur për shpifje nga Kryetari i Bashkisë Tiranë, Erion Veliaj, pasi Kalaja është shprehur në një emision televiziv se Veliaj, në fillimet e tij politike dhe gjatë pjesëmarrjes në lëvizjen “Mjaft”, ka pasur sjellje që ai i konsideron të papërshtatshme dhe që lidhen me ofrimin e shërbimeve ndaj ambasadave të huaja.
Ai ka thënë se Veliaj dhe disa bashkëpunëtorë të tij, duke përfshirë Arbi Maznikun, Endri Fugan dhe vëllain e Veliajt, janë veshur si femra dhe kanë marrë pjesë në ahengje që sipas Kalasë kanë pasur karakter seksual.
