Para dy ditësh transmetuam disa problematika në Klinikën Stomatologjike Universitare të Tiranës për shkelje që lidhen me shkarkime të dyshimta apo emërime pa procedura.
Veç të tjerash, drejtoresha Belisa Kaleci akuzohet se mban ende në detyrë shefen e financës, Liljana Kuka, e cila ka dalë në pension prej dy vitesh.
Për më tepër, kjo e fundit ka qenë e përfshirë në një rast falsifikimi diplome të denoncuar publikisht në vitin 2019, falsifikim që e ka pranuar edhe vetë e akuzuara.
Drejtoresha Kaleci, e pyetur për këtë çështje, tha se nuk ka kandidatë të interesuar. Por të nesërmen e transmetimit tonë, QSUT shpalli vendin vakant për pozicionin “përgjegjës i sektorit të financës”.
