Një akuzë e re serioze ndaj kongresmenit amerikan Eric Swalwell ka dalë në dritë, pasi një tjetër grua pretendon se politikani demokrat e ka droguar dhe përdhunuar në një dhomë hoteli në vitin 2018, në West Hollywood.
Kjo çështje i shtohet një serie akuzash të ngjashme që kanë goditur ndjeshëm karrierën e tij politike, duke çuar në njoftimin e dorëheqjes nga Kongresi dhe tërheqjen nga gara për postin e guvernatorit të Kalifornisë
Sipas deklarimeve, gruaja e quajtur Lona Druz pretendon se Swalwell e ka droguar dhe më pas e ka përdhunuar në një hotel në West Hollywood, duke thënë se fillimisht mendonte se kishte një marrëdhënie miqësore me të dhe se ai i kishte ofruar ndihmë profesionale për kompaninë e saj në fushën e teknologjisë së modës.
Ajo ka folur në një konferencë për shtyp në Beverly Hills, duke u shprehur emocionalisht se ngjarja i ka shkatërruar jetën dhe ka ndikuar rëndë në shëndetin e saj mendor, duke e lënë “duke qarë vazhdimisht”.
Sipas saj, ajo e kishte takuar Swalwell tre herë në vitin 2018, periudhë kur punonte si modele në Beverly Hills dhe njëkohësisht drejtonte një kompani teknologjie për modën.
“Pas njohjes sonë, ai më ofroi kontakte profesionale për zhvillimin e kompanisë sime, ndërsa unë isha gjithashtu e interesuar për politikën lokale”, tha ajo.
Ajo shtoi se politikani e kishte ftuar në dy evente publike dhe se ishte në dijeni që ai ishte i martuar dhe se bashkëshortja e tij ishte shtatzënë në atë periudhë.
“S’e konsideroja asgjë tjetër veç mik. Në takimin e tretë mendoj se më ka vendosur substancë në pije. Kisha pirë vetëm një gotë verë”, pretendoi ajo.
Druz deklaroi se fillimisht do të shkonin në një aktivitet politik, por Swalwell i kishte thënë se duhej të ndalonin në dhomën e tij të hotelit për të marrë disa dokumente.
“Kur arrita në dhomën e hotelit, isha tashmë e paaftë të reagoja dhe nuk mund të lëvizja krahët mbi trupin tim. Ai më përdhunoi dhe më mbyti. Ndërsa më mbyste, humba ndjenjat. Mendova se vdiqa”, u shpreh ajo.
Ajo theksoi se nuk ka pasur asnjëherë konsensus për asnjë akt seksual dhe se, megjithëse nuk iu nënshtrua ekzaminimit mjeko-ligjor në atë kohë, kishte informuar persona të afërt për ngjarjen.
Gjithashtu, ajo tha se i kishte dokumentuar ngjarjet në ditarin e saj personal dhe se përvoja e saj është trajtuar edhe në seanca terapie në një qendër mbështetëse për viktimat e abuzimit seksual në Connecticut.
“Ka pasur ndikim të thellë në shëndetin tim mendor. Fillova të përdor forma të pashëndetshme vetë-mjekimi. Nuk doja të jetoja më”, tha ajo.
Druz shtoi gjithashtu se në atë periudhë ishte në një lidhje stabile dhe se nuk kishte tradhtuar kurrë partnerin e saj.
“Nuk do të përfshihesha kurrë në një marrëdhënie seksuale me konsensus. Kjo e bën edhe më të qartë natyrën jo-konsensuale të asaj që ndodhi”, deklaroi ajo.
Ajo tha se ka vonuar të ndërmarrë hapa ligjorë për shkak të frikës, duke përmendur ndikimin politik të Swalwell dhe lidhjet e tij me autoritetet. Sipas avokates së saj, Lisa Bloom, do të dorëzohet një ankesë në Zyrën e Sherifit të Qarkut të Los Anxhelosit, e cila ka juridiksion për ngjarje në West Hollywood.
Ajo shtoi se Druz do të bashkëpunojë plotësisht me autoritetet, duke dorëzuar prova si mesazhe, fotografi, shënime ditari dhe dëshmi dëshmitarësh.
Kjo denoncim vjen pak ditë pasi katër gra të tjera kanë bërë akuza ndaj Swalwell, përfshirë edhe pretendime për përdhunim.
Një prej tyre, Anika Albrecht, tha për CBS News se politikani kishte nisur komunikime me të pas një takimi në një ekskursion universitar dhe se bisedat kishin marrë gradualisht karakter seksualisht të papërshtatshëm.
Ajo shtoi se Swalwell i kishte propozuar të takoheshin në një dhomë hoteli, por ajo kishte refuzuar.
“Vazhdoj të mendoj sa me fat isha që nuk shkova në atë hotel”, tha ajo.
Një tjetër grua, e paidentifikuar, ka deklaruar për CNN se Swalwell e ka përdhunuar në një dhomë hoteli në Nju Jork në vitin 2024, duke thënë se ishte në gjendje të dehur dhe u zgjua gjatë abuzimit.
“E shtyja duke i thënë ‘jo’. Ai nuk u ndal”, u shpreh ajo.
Prokuroria e Manhattanit ka nisur hetimet për këtë rast, përmes Zyrës së Prokurorit të Qarkut të Manhattanit Manhattan District Attorney’s Office.
Pavarësisht presionit të madh, Swalwell i ka mohuar akuzat, duke deklaruar në një video në rrjetet sociale:
“U kërkoj sinqerisht falje familjes sime, stafit dhe votuesve për gabimet e gjykimit që kam bërë në të kaluarën. Do të kundërshtoj akuzat serioze të rreme që janë ngritur ndaj meje. Megjithatë, duhet të marr përgjegjësi për gabimet që kam bërë vërtet”, shtoi ai.
