Një 39-vjeçar është arrestuar në flagrancë në Shijak, pasi kanosi me mjet prerës dhe dhunoi fizikisht një 55-vjeçar, duke shkaktuar edhe dëme materiale.
Sipas Policisë, shtetasi me iniciale I. N., banues në Shijak, për motive të dobëta ka dëmtuar me hanxhar xhamin e automjetit të shtetasit D. Ç., 55 vjeç, në lagjen “Popullore”.
Pas dëmtimit të automjetit, 39-vjeçari dyshohet se ka goditur fizikisht 55-vjeçarin dhe e ka kanosur atë me hanxhar, duke e kërcënuar për jetën.
Ai është arrestuar nga Policia, ndërsa janë sekuestruar në cilësinë e provës materiale një thikë dhe një hanxhar.
Ndaj 39-vjeçarit rëndojnë akuzat për veprat penale “Kanosja”, “Shkatërrimi i pronës” dhe “Prodhimi dhe mbajtja pa leje e armëve të ftohta”, ndërsa materialet procedurale i janë referuar Prokurorisë pranë Gjykatës së Juridiksionit të Përgjithshëm Durrës për veprime të mëtejshme.
