Zyrtarët amerikanë kanë zbuluar dronë të paidentifikuar mbi një bazë ushtarake në Washington ku jetojnë sekretari i Shtetit Marco Rubio dhe sekretari i Mbrojtjes Pete Hegseth, sipas një raportimi të Washington Post, që citon burime të informuara mbi situatën.
Sipas tre personave të njohur me zhvillimet, autoritetet ende nuk kanë përcaktuar origjinën e këtyre dronëve.
Incidentet janë regjistruar në bazën Fort Lesley J. McNair, ku në një natë të vetme gjatë 10 ditëve të fundit janë vërejtur disa dronë, duke nxitur masa të shtuara sigurie dhe një mbledhje në Shtëpinë e Bardhë për të diskutuar përgjigjen.
Ngjarja vjen në një moment të rritjes së tensioneve, ndërsa Shtetet e Bashkuara dhe Izraeli vazhdojnë goditjet ndaj Iranit. Sipas një zyrtari të lartë të administratës, ushtria amerikane ka intensifikuar monitorimin e kërcënimeve për shkak të nivelit të lartë të alarmit.
Paralelisht, SHBA ka lëshuar një alarm global për sigurinë e misioneve diplomatike jashtë vendit dhe ka forcuar masat në disa baza brenda territorit amerikan. Baza të rëndësishme si Joint Base McGuire-Dix-Lakehurst në New Jersey dhe MacDill Air Force Base në Florida kanë ngritur nivelin e sigurisë në “Charlie”, që sinjalizon rrezik të mundshëm sulmi.
Incidentet me dronë kanë shtyrë autoritetet të shqyrtojnë edhe mundësinë e zhvendosjes së Rubio-s dhe Hegseth-it nga baza, megjithëse një zyrtar i administratës konfirmoi se ata nuk janë zhvendosur.
