Zbardhet bastisja e shkollës 9-vjeçare “Besëlidhja”, e ndodhur katër ditë më parë në Lezhë.
Policia identifikon 6 autorët e krimit, mes tyre pesë të mitur, duke arrestuar një 22-vjeçar si autor kryesor dhe proceduar në gjendje të lirë të tjerët.
Aksioni u kodua “Pajisjet”. Pasi hynë pas mesnate në ambientet e shkollës, ata vodhën 19 pajisje dhe dëmtuan dyert e godinës arsimore.
“Në vijim, në kuadër të operacionit të koduar “Pajisjet”, u vu në pranga shtetasi A. B., 22 vjeç, si dhe u proceduan penalisht 5 të mitur të moshave 15-17 vjeç (3 prej tyre, nxënës në këtë shkollë), të cilët dyshohet se janë nxitur nga 22-vjeçari, për kryerjen e këtij krimi”, thuhet në njoftimin zyrtar.
Burime zyrtare thanë se gjatë kontrolleve u gjetën edhe 16 prej pajisjeve të vjedhura (laptopë, videoprojektorë dhe server), të fshehura në një objekt në ndërtim dhe në banesën e të arrestuarit.
