Një vatër zjarri është aktivizuar pasditen e sotme në fshatin Krajkë, në Bulqizë, duke përfshirë një sipërfaqe të konsiderueshme me shkurre dhe duke rrezikuar banesat përreth.
Sipas informacioneve, flakët janë përhapur me shpejtësi për shkak të erës së fortë, duke e bërë më të vështirë kontrollin e situatës.
Dyshohet se zjarri ka ardhur si pasojë e djegies së barishteve në toka bujqësore nga banorët e zon[, një praktikë e zakonshme që shpesh del jashtë kontrollit dhe kthehet në rrezik serioz për mjedisin dhe pronat.
Kjo situatë përsëritet pothuajse çdo vit në zonën e Bulqizës dhe më gjerë në Qarkun Dibër, ku zjarret shkaktojnë dëme të konsiderueshme, sidomos në pyjet me dushqe.
Siç mund të shihet dhe në foton e mësipërme tymi ka pushtuar zonën, ndërsa deri më tani nuk raportohet për persona të lënduar.
