Në një nga fshatrat turistike të Shqipërisë, Gjinar, infrastruktura rrugore ka pësuar dëmtime të ndjeshme duke krijuar probleme serioze për banorët e zonës.
Në aksin rrugor pranë Zavalinës, vetëm 500 metra larg Gjinarit dhe buzë një rezervuari artificial, është konstatuar një çarje e madhe në rrugë.
Sipas matjeve të kryera, thellësia e çarjes arrin deri në 70 cm, niveli i rrugës së rrëshqitur është 25 cm, ndërsa gjerësia e gropës së krijuar është 82 cm. Në total, gjatësia e segmentit të dëmtuar shkon në 50 metra.
Duke folur për emisionin investigativ “TakFak”, banorët shprehen se situata është e pandryshuar pavarësisht ankesave të vazhdueshme ndaj pushtetit vendor.
Ata tregojnë se rruga është prishur për herë të dytë brenda një viti, duke rrezikuar qarkullimin e automjeteve dhe sigurinë e fëmijëve.
“Kjo rrugë është shumë shqetësuese. Zërin e kemi ngritur, por kush të dëgjon? Jemi dhe me fëmijë të vegjël. Kam vite që kam ikur dhe arsyeja e ikjes ka qenë rruga, uji, energjia elektrike ka qenë e dobët”, thotë një banor.
“Para 2-3 javësh ra një makinë, pastaj një kushëriri im që pati punuar me ta, (me firmën), foli me ta dhe sollën një skodë zhavorr, e hodhën ata, nuk ndenji as dy ditë prapë u hap. Taksat i paguajmë, shteti ose jepja, ose hiqja”, thotë një tjetër banor./News24/
