Çifti i moshuar Zenel Hyseni dhe Bafte Hyseni iu drejtuan emisionit “Stop”, pasi rrezikonin të dilnin nga shtëpia për shkak të një konflikti familjar, që zgjat prej vitesh.
Konflikti nisi në vitin 2011, kur ata blenë banesën dhe kunati i tyre, si ish-i përndjekur politik, përfitoi një kredi prej 40 milionë lekësh të vjetra dhe ua dha për ta përdorur, me marrëveshje verbale që kredia do të paguhej prej tyre në emër të tij.
“Në vitin 2011 ne kishim mbledhur disa lekë me shumë mund për të blerë një shtëpi dhe kërkonim për shtëpi. Mirëpo një ditë erdhi me burrin e motrës dhe thotë që kam një kredi me 0% si i përndjekur politik dhe për dy javë ajo skadon kështu që po deshët.
Ne u gënjyem dhe na pëlqeu, gjetëm këtë shtëpinë këtu, ata e kishin me barrë, me bankë dhe do ua sekuestronin këtë shtëpi dhe ne ndihmuam edhe këto që ua blemë edhe vetë gjasme u bëmë me shtëpi. Dhe e lamë që kredinë do e paguanim deri në vitin 2022 dhe ne e kemi paguar, por nuk e dimë se çfarë është bërë”, tha Bafte Hyseni.
Pas disa vitesh marrëdhëniet mes motrave u përkeqësuan dhe kredia u kthye në burim konflikti. Çështja përfundoi në gjykatë, por gjatë procesit palët arritën një marrëveshje në një zyrë ndërmjetësimi me ndërmjetësuesen Drita Avdyli, sipas së cilës familja Hyseni duhej të paguante 25 mijë euro brenda 10 ditësh, ndërsa çdo vonesë do të kushtonte 100 euro në ditë.
Sipas çiftit, ata ia dorëzuan shumën prej 25 mijë eurosh avokatit Korab Zenuni, që ta kalonte në llogarinë e ndërmjetësueses, por pagesa nuk u krye për një vit. Për pasojë, borxhi u rrit nga 25 mijë në 58 mijë euro për shkak të kamatëvonesave.
Avokati deklaroi se paratë i kishte transferuar, ndërsa ndërmjetësuesja e mohoi kategorikisht këtë gjë.
Pas verifikimeve dhe ndërhyrjes së emisionit “Stop”, u arrit një marrëveshje mes palëve. Familja Hyseni do të paguajë vetëm shumën fillestare prej 25 mijë eurosh, pa kamatat e akumuluara prej 33 mijë eurosh, duke i dhënë fund konfliktit. /Emisioni STOP
