Presidentja e Komisionit Evropian Ursula von der Leyen premtoi të martën nga Kievi se Bashkimi Evropian do t’i ofrojë Ukrainës kredinë prej 90 miliardë eurosh.
Ajo theksoi se Rusia po synon sistematikisht infrastrukturën energjetike dhe se BE do të ndihmojë Ukrainën të rezistojë dhe të kundërpërgjigjet me mbështetje të re.
Mbështetja e plotë dhe e vazhdueshme për popullin e Ukrainës, u konfirmua nga më shumë se tridhjetë udhëheqës që morën pjesë në një video-konferencë mbi Ukrainën, me ftesë të Kryeministrit Britanik Keir Starmer, Presidentit Francez Emmanuel Macron dhe Kancelarit Gjerman Friedrich Merz.
Sipas një deklarate të lëshuar pas përfundimit të videokonferencës, udhëheqësit përsëritën angazhimin e tyre të palëkundur për të punuar së bashku për të arritur një paqe të drejtë dhe të qëndrueshme, në përputhje me parimet e Kartës së Kombeve të Bashkuara, dhe përsëritën qëndrimin e tyre të vendosur se kufijtë ndërkombëtarë nuk duhet të ndryshohen me forcë.
Udhëheqësit gjithashtu riafirmuan angazhimin e tyre për të intensifikuar presionin ekonomik mbi Rusinë, përmes sanksioneve shtesë dhe duke synuar flotën në hije ruse dhe rrjetet e tregtimit të naftës, industrinë ushtarake ruse, si dhe duke prishur rrjetet financiare të Rusisë.
