Nga Boldnews.al
Kur Xhuljeta Çuni, një vajzë 19-vjeçare mbërriti në komisariatin 3, më 7 maj të këtij viti, e frikësuar dhe me lot në sy, policia krejt ftohtë i mori një deklaratë, më pas thirri për dëshmi Xhafer Matën, kërcënuesin e saj. Pak minuta e mbajtënë në komisariat 31-vjeçarin dhe e lanë të lirë. Ndoshta që nga ai moment mendja e Matës nisi të mendonte vetëm për keq, si ti merrte jetën vajzës 19-vjeçare, që thuhet se kishte një raport intim me të.
Policia vetëm me dy deklarata e mbylli këtë histori, por në fakt ishte nisja e hapjes së dy varreve… Më 7 qershor, kur Xhuljeta Çuni nxitonte për të dhënë provimin e maturës në letërsi, rrugën ia preu Xhafer Mata, pas pak fjalëve kërcënuse nxorri armën dhe qëlloi dy herë mbi 19-vjeçaren, duke e lënë të vdekur në vend. Më pas në gjendje të rënduar psikologjike, shkrehu edhe armën ndaj vetes dhe vdiq pak minuta pasi e dërguan në spital. Në dosjet e policisë thjeshtë u regjistrua një e vrarë dhe një vetëvrasje më shumë. Askush nuk shkoi më tej, as SHÇBA për të hetuar në detaje se përse nuk u arrestua për kërcënim dhe përndjekje 31-vjeçari. Gjithashtu Xhuljeta nuk mund të siguronte urdhër-mbrojtje, pasi ligji e ka të përcaktuar se përfitojnë bashkëshortet, bashkëjetueset apo anëtarët e një familje, kur një person konsiderohet dhunues. Kjo kleçkë e ligjit duhet riparë e madje ndryshuar, por kërkon një grup të vogël deputetësh që ta marrin këtë nismë. Në të vërtetë në parlament janë 40 gra nga të katër forcat politike, por asnjëra prej tyre nuk ka tentuar që në këtë legjislaturë të rishikojë edhe një herë ligjin, kryesisht në mbrojtje të grave dhe fëmijëve.
Pa u tharë lulet mbi varrin e Xhuljetës, një tjetër krim i rëndë shënohet në Durrës. Këtë herë viktimë nga dora e burrit u bë Ardiana Shaholli. 40-vjeçarja humbi jetën pak pasi u dërgua në spital. Bashkëshorti i saj e kishte përplasur disa herë në dysheme, duke i shkaktuar plagë vdekjeprurëve. Për këtë rast policia nxitoi të deklaraonte se nuk kishte pasur denocim, por aty në lagje të gjithë e dinin se 40-vjeçarja dhunohej shpesh nga bashkëshorti. Ajo heshti për të mbular “turpin”, ndoshta kishte edhe mungesë besimi në institucionet e vendit, por tashmë është një jetë e ikur dhe katër fëmijë, të mitur të mbetur jetim. Në 12 muajt e fundit janë dhjetë gra të vrara, disa prej të cilave edhe pse denocuan dhunën nuk mundën të kishin pranë dorën e shtetit, që të ndalte “dorën” që shkreh armë dhe i dhunoi deri në vdekje.
