Kanadaja ka nisur një program multimiliardësh për të forcuar ushtrinë e saj dhe për të zvogëluar varësinë nga Shtetet e Bashkuara në operacionet kombëtare.
Kryeministri kanadez, Mark Carney, tha gjatë një vizite në zyrat e kompanisë CAE, e specializuar në teknologjitë e simulimit për sektorët e mbrojtjes dhe hapësirës ajrore:
“Ne kemi mbështetur shumë në gjeografinë tonë dhe te të tjerët për mbrojtjen e vetes. Kjo ka krijuar dobësi që nuk mund t’i lejojmë më, dhe varësi që nuk janë më të qëndrueshme.”
Sipas mediave të huaja, strategjia industriale e mbrojtjes kanadeze është pjesë e një plani pesëvjeçar prej 82 miliardë dollarësh për mbrojtjen, me qëllim që Kanadaja të arrijë objektivat e shpenzimeve të NATO-s: 2% të PBB-së deri në fund të vitit dhe 5% deri në vitin 2035.
Carney theksoi se bota po bëhet gjithnjë e më e rrezikshme dhe se Shtetet e Bashkuara nuk janë më një partner i besueshëm për mbrojtjen e Kanadasë. Plani përfshin forcimin e aftësive mbrojtëse në tokë, det dhe ajër.
“Bota ka ndryshuar dhe Kanadaja duhet të ndryshojë bashkë me të,” shtoi ai.
Kryeministri shprehu gjithashtu shqetësimin për dominimin e Kanadasë në Arktik, ku ngrohja globale po shkrin akujt dhe po rrit interesin e fuqive të mëdha për burimet minerale kritike të rajonit.
Carney është bërë një zë kritik global ndaj politikave të administratës së presidentit të SHBA-së, Donald Trump, duke theksuar se rendi global i dekadave të kaluara është i kërcënuar. Në një fjalim të mbajtur në Forumin Ekonomik Botëror në Davos, ai nënvizoi se nacionalizmi kanadez që ai promovon është antiteza e perspektivës amerikane të administratës Trump.
