Dhoma e Avokatisë Vlorë i ka drejtuar një kërkesë Këshilli të Lartë Gjyqësor dhe Ministrisë së Drejtësisë së Shqipërisë, duke kërkuar rishikimin urgjent të hartës gjyqësore, të cilën e konsideron një dështim.
Në deklaratën zyrtare theksohet se centralizimi i tejskajshëm i gjykatave, veçanërisht në nivel apeli, ka sjellë mbingarkesë dhe vonesa në shqyrtimin e çështjeve.
Sipas Dhomës së Avokatisë, kjo situatë ka rritur kostot për qytetarët dhe profesionistët e së drejtës, sidomos për ata që jetojnë larg qendrave ku janë përqendruar gjykatat.
“Sot, pas një periudhe të mjaftueshme zbatimi, është e qartë se centralizimi i tejskajshëm i gjykatave, veçanërisht në nivel apeli, ka krijuar mbingarkesë serioze, vonesa të papranueshme në shqyrtimin e çështjeve dhe kosto të shtuar për qytetarët dhe profesionistët e së drejtës.
Aksesi real në drejtësi është vështirësuar ndjeshëm, sidomos për qytetarët që jetojnë larg qendrave të përqendruara gjyqësore.
Kjo situatë krijon një cenim të drejtpërdrejtë të së drejtës për një proces të rregullt ligjor, duke e shndërruar të drejtën për ankim në një mjet formal dhe jo efektiv, në kundërshtim me standardet kushtetuese dhe konvencionale”, thuhet në deklaratë.
