Greqia është pranë marrjes së një vendimi për të kufizuar përdorimin e rrjeteve sociale nga fëmijët nën moshën 15 vjeç.
Ky zhvillim vjen vetëm pak orë pasi Spanja, pas Australisë, Francës dhe Portugalisë, njoftoi se po planifikon masa të ngjashme për ndalimin e aksesit në rrjetet sociale për të miturit nën 16 vjeç.
Kryeministri grek, Kyriakos Mitsotakis, ka deklaruar më herët se kufizimi i përdorimit të rrjeteve sociale për të miturit është një nga opsionet që po shqyrton qeveria. Ai theksoi se gjatë vitit 2025 kjo çështje është diskutuar seriozisht në nivel institucional.
Sipas tij, problematika nuk lidhet vetëm me rrjetet sociale, por edhe me mënyrën se si fëmijët ndërveprojnë me teknologjitë e inteligjencës artificiale.
“A duam vërtet që fëmijët tanë të kenë ‘miq digjitalë’ që mund t’i çojnë drejt sjelljeve jo vetëm të papranueshme, por edhe shkatërruese?”, është shprehur Mitsotakis.
Ai ka shtuar se kompanitë e teknologjisë duhet të respektojnë rregullat e vendosura nga shtetet dhe se nuk është e pranueshme që ato të përfitojnë financiarisht nga cenueshmëria e fëmijëve.
