Ilir Meta, nga burgu i është përgjigjur ministrit të drejtësisë, Besfort Lamallari, i cili gjatë interpelancës në Parlament me Tedi Blushin, foli për kushtet në burgje, ndërsa tha ndër të tjera se “nuk ka patur persekutim politik për Ilir Metën”.
Përmes një postimi në rrjete sociale, Meta ka ironizuar Lamallarin duke e quajtur simbol i korrupsionit, ndërsa ka ngritur shqetësime për kushtet në qelitë e burgut.
Sipas tij, kushtet nuk janë siç i prezanton Lamallari, por burgu ka vazhdimisht ndërprerje të energjisë elektrike dhe, sipas Metës, shumë prej të burgosurve vdesin për mungesën e trajtimit të duhur shëndetësor.
“Dëgjova “Diellën” e Drejtësisë që fliste për situatën në burgje dhe meqë nuk e di po e njoftoj që vetëm dje ka ikur 42 herë energjia elektrike te IEPV “Jordan Misja”, jo vetëm për mua, por për rreth 500 të burgosur e të paraburgosur që ndodhen këtu.
A e di “Diella” e Drejtësisë që këtu ka vetëm 3 orë ujë në ditë? A e di “Diella” e Drejtësisë që në burgje vdesin qytetarë për mungesën e trajtimit të duhur shëndetësor?
A e di “Diella” e Drejtësisë që gardianët nuk kanë marrë asnjë qindarkë shpërblim për punën jashtë orarit, as ushqimin, as trajtimin që meritojnë sipas ligjit? E ç’mund të presësh nga “Diellat”? Ato janë pjellë e AKSHI-t, simbolit të korrupsionit skizofrenik”, shkruan Meta.
