Presidenti i Republikës Ilir Meta e ka cilësuar një lajm shokues ndarjen nga jeta të Presidentit të Federatës së Futbollit të Kosovës Fadil Vokrri.
Meta tregon se vetëm pak ditë më parë kishte firmosur dhënien e shtetësisë për për Vokrrin për kontributin e tij të veçantë në mbështetje të futbollit tonë. Ai i shpreh ngushëllimet familjes dhe thotë se Vokrri do vazhdojë të jetë frymëzim për brezat e rinj.
“Ndarja e parakohshme nga jeta e legjendës së futbollit të Kosovës, Fadil Vokrri, është një lajm shokues për të gjithë shqiptarët që e kanë ndjekur e adhuruar shkëlqimin e talentit të tij si sulmues e golashënues i Prishtinës, por edhe ekipeve të njohura europiane të Partizanit të Beogradit, Fenerbahçe e madje edhe të përfaqësueses së ish-Jugosllavisë.
Fadil Vokrri me talentin dhe suksesin e tij frymëzoi shumë fëmijë shqiptarë kudo për të ecur në shembullin e tij. Me personalitetin e tij ndërkombëtar ndihmoi integrimin e Kosovës në UEFA dhe FIFA. Pak ditë më parë pata kënaqësinë të firmosja dhënien e shtetësisë shqiptare për Fadil Vokrrin me kërkesë të FSHF për kontributin e tij të veçantë në mbështetje të futbollit tonë e sidomos ekipeve kombëtare.
Duke i shprehur ngushëllimet më të sinqerta familjarëve të Fadil Vokrrit, Federatës së Futbollit të Kosovës, mbarë botës shqiptare të futbollit, jam i bindur se personaliteti i jashtëzakonshëm që ai krijoi në fushën e blertë do vazhdojë të frymëzojë gjeneratat më të reja në rrugën e suksesit!”, shprehet Presidenti Meta.
