Një 42-vjeçar nga Fieri është arrestuar pasi dyshohet se për një periudhë të gjatë kohore ka hedhur në treg ilaçe të skaduara dhe medikamente të futura kontrabandë, të cilat i shpërndante në farmacitë e qytetit me qëllim përfitimi financiar.
Sipas hetimeve, shtetasi me inicialet B. B. magazinonte në banesën e tij sasi të mëdha medikamentesh, një pjesë e konsiderueshme e të cilave rezultuan të skaduara, ndërsa pjesa tjetër pa faturë tatimore.
Gjatë kontrollit në banesë, autoritetet gjetën dhe sekuestruan gjithsej 4289 kuti me ilaçe të ndryshme.
Nga kjo sasi, 1635 kuti ishin ilaçe të skaduara, ndërsa 2654 kuti rezultuan pa dokumentacion tatimor dhe dyshohet se ishin futur në vend në mënyrë të paligjshme.
