Influencuesja dhe sipërmarrësja italiane Chiara Ferragni është shpallur e pafajshme nga një gjykatë në Milano, lidhur me akuzat për mashtrim që lidhnin emrin e saj me një nismë bamirësie të vitit 2022, për shitjen e tortave tradicionale Pandoro.
Vendimi i gjykatës i jep fund një procesi dyvjeçar që vuri në qendër të debatit publik figurën e Ferragni-t dhe bashkëpunimin e saj me kompaninë Balocco.
Sipas akuzës, konsumatorët ishin lënë të kuptonin se çdo Pandoro i shitur kontribuonte financiarisht për Spitalin pediatrik Regina Margherita në Torino. Hetimet, megjithatë, zbuluan se ishte kryer vetëm një donacion prej 50 mijë eurosh, duke ngritur pikëpyetje mbi transparencën e fushatës.
Prokuroria kërkoi dënim me burg për influencuesen, por gjykata vendosi se Ferragni nuk mbante përgjegjësi penale, duke rrëzuar akuzat.
Në reagimin pas vendimit, Ferragni tha se ka kaluar një periudhë të vështirë të jetës së saj dhe se për dy vite ka jetuar nën presion të vazhdueshëm, por ka besuar se drejtësia do të triumfonte. Ajo shtoi se synon të rikthehet në qetësi dhe të rimarrë kontrollin mbi karrierën dhe jetën personale.
