Të enjten u takuan përfaqësuesit e ministrive të brendshme nga Europa qendrore dhe juglindore në Sarajevë, për të marrë masa kundër refugjatëve ilegalë dhe për të rritur bashkëpunimin, shkruan “Der Standard”.
Ministri i brendshëm boshnjak Dragan Mektic foli me përfaqësuesit e tjerë dhe austriakë, duke u premtuar shkëmbimin e informacioneve rreth refugjatëve.
Gjatë kohës kur europianët diskutonin për marrëveshjen mes njëri-tjetrit, Turqia bëri të ditur prishjen e marrëveshjes së ripranimit të refugjatëve me Greqinë, pasi kjo e fundit nuk i dorëzon ushtarët e akuzuar për Grusht shteti në Turqi. Marrëveshja me BE-në mbetet në fuqi.
Në Bosnjë janë rregjistruar 5000 refugjatë, prej të cilëve gjysma ndodhen në vend. Autoritetet boshnjake kanë frikë se iranianët që udhëtojnë pa viza në Beograd, mund të vijnë në Sarajevë si emigrantë.
1.5 milion euro
Si fillim, BE e ka ndihmuar Bosnjën me 1.5 milion euro. Tema e refugjatëve ka tensionuar përsëri Europën. Sipas medias kroate Jutarnji List, ministria e brendshme në Zagreb ka kritikuar presionet nga Austria, veçanërisht planin për të dërguar ushtrinë në kufi. “Ne ia kemi bërë të qartë Austrisë, se duhet të jenë të qetë dhe konstruktivë,” tha një përfaqësues i ministrisë për Jutarnji List. Kroacia thotë se nuk ka nevojë për ushtri, por vetëm shtim të numrit të policëve.
Asnjë kërkesë nga Tirana
Kancelari austriak Sebastian Kurz (ÖVP) të mërkurën u shpreh: “Kemi arritur marrëveshjen me qeverinë shqiptare, që do kenë mbështetje nga ana jonë me policë nga Austria dhe pajisje përkatëse.” Megjithatë në pyetjen e Standard për drejtorin e kabinetit të ministrisë së brendshme shqiptare, Adriatik Mema, në lidhje më këtë thotë: “Unë mund të vërtetoj, që nuk ka kërkesë nga Shqipëria, që policët austriakë të vijnë drejt Shqipërisë.”
Megjithatë Mema theksoi se ka nevojë për pajisje elektronike më të sofistikuara për të mundësuar kontrollimin më të mirë të kufirit. Nga Frontex momentalisht janë vetëm dy ushtarë në Shqipëri. Politikanët shqiptarë theksojnë se ky problem është më i vogël sesa paraqitet.
Momentalisht në Shqipëri ndodhen 2400 refugjatë nga Siria, Pakistani tha kryeministri Edi Rama për gazetarët austriakë në Tiranë. “Ne nuk duam të ndërtojmë gardhe,” vijoi Rama. “Çfarë ne kemi nevojë, është një “gardh” nga bashkëpunimi.”
