Autoritetet italiane kanë konfirmuar se janë identifikuar 6 të rinjtë italianë që humbën jetën në zjarrin që përfshiu pub-in Le Constellation në Crans-Montana të Zvicrës, natën e Vitit të Ri. Lajmi u bë i ditur sot pasdite nga ministri i Jashtëm e Zv KM, Antonio Tajani.
“Fatkeqësisht viktimat italiane janë gjashtë, të gjitha të identifikuara”, deklaroi Tajani.
Ai shtoi se trupat e pajetë do të kthehen në Itali me një avion shtetëror të Forcave Ajrore Italiane, ndërsa të plagosurit po transferohen gradualisht në spitale italiane. Tre prej tyre do të dërgohen në spitalin Niguarda në Milano dhe një në Torino. Numri i pacientëve të shtruar në Niguarda ka shkuar në 11.
Raportohet se viktimat italiane janë: Giovanni Tamburi (16 vjeç, Bolonjë), Achille Barosi (16 vjeç, Milano), Emanuele Galeppini (pothuajse 17 vjeç, Xhenova), Chiara Costanzo (16 vjeçe, Milano), Sofia Prosperi (15 vjeçe, italo-zvicerane) dhe Riçardo Minghetti (16 vjeç, Romë).
Ambasadori i Italisë në Zvicër, Gian Lorenzo Cornado, ka bërë të ditur se kthimi i trupave të viktimave në Itali mund të ndodhë që nesër, edhe pse ende nuk ka një konfirmim përfundimtar.
Avioni shtetëror pritet të bëjë disa ndalesa në qytetet nga vinin viktimat, ndërsa familjarëve u është ofruar mundësia të udhëtojnë me të njëjtin fluturim.
“Ekzistojnë fatkeqësitë, por kjo nuk ishte një fatkeqësi: ishte një tragjedi e shmangshme. Do të kishte mjaftuar pak më shumë parandalim dhe minimumi i arsyes së shëndoshë”, deklaroi diplomati italian.
Dhe Papa Leone XIV, gjatë lutjes së Angelus-it, ka shprehur afërsinë e tij me familjet e viktimave dhe me të plagosurit. “Dëshiroj të shpreh edhe një herë afërsinë time me të gjithë ata që janë në dhimbje për shkak të tragjedisë së ndodhur në Crans-Montana, në Zvicër. Lutja ime për të rinjtë që humbën jetën, për të plagosurit dhe për familjarët e tyre”, tha Ati i Shenjtë.
Bilanci i përgjithshëm i viktimave të identifikuara nga policia zvicerane ka arritur në 24 persona. Mes tyre ka shtetas zviceranë të moshave 14 deri në 31 vjeç, një rumun 18-vjeçar, një francez 39-vjeçar dhe një shtetas turk 18-vjeçar. Sipas autoriteteve, identifikimi i viktimave është pothuajse i plotë.
Prokuroria e Përgjithshme e Kantonit Valais ka bërë të ditur se janë nën hetim Jacques dhe Jessica Maric-Moretti, çifti që administronte lokalin Le Constellation. Ata akuzohen për vrasje nga pakujdesia, neglizhencë, plagosje personale dhe zjarrvënie nga pakujdesia. Edhe pse është konfirmuar ekzistenca e një daljeje emergjence, disa dëshmitarë kanë deklaruar se porta ishte e bllokuar.
