Një zonjë nga Vlora tregon për emisionin “Stop” se bashkë me djalin e saj 10-vjeçar, ndjehen të përndjekur nga ish-shoferi i familjes, Vladimir Rushiti, 60 vjeç.
Ai kishte punuar për rreth nëntë muaj pranë familjes, por pas largimit për shkak të moskorrektesës në punë është kthyer në përndjekës, duke kërcënuar dhe frikësuar nënën e fëmijën.
Zonja ka bërë denoncim, por nuk është marrë asnjë masë.
“Kam një problem me një zotëri që quhet Vladimir Rushiti rreth 60-vjeç. Personi në fjalë është shumë problematik, unë e kam pasur në marrëdhënie pune, shofer përreth 6 muaj. Por, duke parë ecurinë e atij, nuk ishte korrekt dhe sillte shumë probleme. Në momentin kur unë e kam hequr nga puna ka filluar që të bëjë gjeste, duke më sharë, ofenduar, duke më çarë gomat e makinë, fillon më ofendon dhe më shan. Duke parë që ai vazhdon akoma, nuk pushon dhe nuk më lë të qetë vendosa që t’iu kontaktoj dhe ndoshta më jepni një zgjidhje. Para pak kohësh personi në fjalë më doli në rrugë, më ofendoi dhe donte që të më dhunonte. Përpos kësaj ai ka ardhur në shtëpi dhe na ka kërcënuar, kam qenë bashkë me djalin tim 10 vjeç. Bëra një denoncim në komisariatin e Vlorës, Maringlen Salaj më priti në zyrën e tij, e shqyrtuam çështjen, por deri më sot nuk kam marrë asnjë përgjigje”, thotë për mikrofonin e emisionit “Stop” qytetarja.
Në këto kushte iu drejtua emisionit “Stop”, që vuri në lëvizje institucionet përkatëse. Gazetarja kontaktoi Shërbimin Social të Bashkisë Vlorë dhe Shoqatën “Vatra”, të cilat ofruan mbështetje psikologjike dhe ligjore për nënën dhe fëmijën.
Më pas gazetarja u interesua pranë OPGJ Maringlen Salaj, i cili deklaroi se materialet i janë dërguar Prokurorisë, por nuk ishte përfshirë videoja e kërcënimit dhe as provat e përsëritura të ngacmimeve.
“Janë bërë të gjitha veprimet proceduriale të nevojshme, të parashikuara nga ligji dhe materialet i janë përcjellë për kompetencë Prokurorisë. Nëqoftëse do, kërko informacion dhe drejtohuni me shkresë zyrtare Drejtorisë Vendore të Policisë Vlorë! Faleminderit!”, tha Maringlen Salaj.
Gazetarja iu drejtua Prokurorisë së Vlorës, ku prokurori i gatshëm, Erion Murataj premtoi, se do të merrej personalisht me çështjen, duke vlerësuar provat e reja, në mënyrë, që të merren masa ndaj përndjekësit.
“Nga informacionet, që mora në fillim nga OPGJ, në fakt kjo i takonte Seksionit tjetër të Përndjekjes. Prokuroria ka 3 seksione, unë jam i përgjithshmi, është seksioni për të mitur, që e marrin në hetim këtë çështje. Por e vlerësove rrezikshmërinë me këto gjëra, që OPGJ-ja, tha ai, dhe paraqitja që të marrë çdolloj prove, çdolloj deklarimi, që ta dorëzonte kallëzimin. Më kupton? Unë kam qenë Prokurori i gatshëm, dhe e kam vlerësuar, a ka rrezikshmëri, për ta arrestuar në momentin, që provat, që ishin, apo jo. Me ato prova, jo me këto, që po më thua ti!
Po të marr për korrektesë! Po e verifikova, është regjistruar si procedim për përndjekje. U lajmërua edhe Prokurori i çështjes dhe është në pritje të marrjes së materialeve, për ta vlerësuar në mënyrë sa më të shpejtë! Nga unë te prokurori i çështjes, u verifikuan. Është regjistruar procedimi. Edhe jemi në pritje të materialeve. Prokurori i çështjes, në pritje të materialeve të reja, për ta vlerësuar të paktën masa vlerësuese të sigurimit”, tha prokurori Erion Murataj./Emisioni STOP
