Autoritetet greke kanë shtuar kontrollet, në prag të festave të fundvitit kryesisht në zonën e Atikës dhe Selanikut.
Sipas raportimit të mediave vendase, dhjetëra patrulla policie kanë dalë në rrugë për të kryer testet e alkoolit te shoferët, të cilët janë shtuar në numër për shkak të festave.
Sipas informacioneve, në Atikë janë kryer më shumë se 6,000 teste alkooli, nga të cilat 87 shoferë rezultuan pozitivë dhe janë arrestuar nga Policia.
Ndërsa në Selanik, ku nga 323 teste alkooli, pesë kanë rezultuar pozitivë dhe shoferët janë arrestuar gjithashtu nga Policia.
Siç raportohet nga autoritetet, për nivele alkooli prej 0.25 mg/l e lart, gjoba e përcaktuar është 350 euro, ndërsa leja e drejtimit gjithashtu hiqet për një muaj.
Kontrollet, sipas autoriteteve kompetente, do të vazhdojnë me intensitet të pazvogëluar, duke synuar sigurinë rrugore dhe uljen e aksidenteve rrugore sidomos tani në ndërrimin e viteve.
