Sekretari i Përgjithshëm i Partisë Demokratike, Flamur Noka, deklaroi në emisionin “Studio 24” se opozita do të intensifikojë protestat për të detyruar kryeministrin Edi Rama të pranojë një qeveri teknike.
Noka akuzoi mazhorancën se funksionon si “narko-pushtet” që nuk jep asgjë me dëshirë.
Ai u ndal edhe te çështja e ministrave të përfshirë në skandale, duke përmendur rastet e Lefter Kokës dhe Ilir Beqajt.
Flamur Noka: Te tuneli i Llogarasë nuk është vetëm Belinda, sepse edhe vizitën në Turqi nuk e bëri Balluku, por e bëri Rama, shkoi ai atje. Tenderat i bën Rama, e thonë mesazhet, “ma ka caktuar ai thotë”.
Nuk besohej më para, e kemi thënë ne, por tani është me zë dhe figurë. Rama direkt drejtorit të rrugëve e i thotë “jepi tenderin filanit”. Ai do bënte siç bëri me Beqajn, Veliajn, edhe me Belindën, por nuk e bën, pse? Sepse është vetë atje i implikuar.
Rama nuk e lëshon Ballukun dhe as Balluku nuk ikën. Unë them se Këshilli i Mandateve nuk do ta votojë. Ishte vetëm opozita sot, ata nuk erdhën, sepse ai ka thënë s’e lëshoj. A s’e lëshon ai, a s’e lëshon ajo, s’e dimë”
Ne dje kemi nisur stinën e protestave dhe kemi një qëllim: A ka moral më kjo bandë që qeveris. Në çdo vend të botës po të kishte ndodhur kjo do kishte rënë qeveria. Nuk ka moral këtu, sepse kacavirren pas pushtetit, sepse e përdorin për të vjedhur.
Dosja “Balluku” ku është zhytur “palloshi i gjatë” dhe dosja e AKSHI-t ku janë zhytur Linda dhe Mirlinda tregojnë se si e shohin shtetin kjo bandë. Nuk kishte bërë kurrë vaki që të merrej peng një biznesmen që rivalizonte kunatin e kryeministrit, këto shihen vetëm në Venezuelë, Meksikë e Kolumbi. Kjo është vetëm maja e ajsbergut të atyre që kemi parë e dëgjuar, sepse ka edhe gjëra të tjera në dosje.
