Nga Boldnews.al
Partia Demokratike nuk u mashtrua, nuk u detyrua dhe nuk u kap në befasi. Ajo firmosi me vetëdije. Firmosi për Endri Shabanin dhe i hapi rrugën zgjedhjes së tij si Avokat i Popullit nga mazhoranca socialiste. Çdo përpjekje për ta paraqitur këtë akt si “procedural” apo “teknik” është gënjeshtër politike dhe fyerje për demokratët.
Sepse në politikë, firma është akt përgjegjësie. Pa firmat e PD-së, Shabani nuk do të ishte as kandidat. Me firmat e PD-së, ai u bë produkt i një procesi ku opozita luajti rolin e bashkëpunëtorit të heshtur. Çjanë këta deputet që sdinë çfarë firmosin!!?
Teatri i rremë opozitar
Pas firmosjes erdhi shfaqja: deklarata, largime nga salla, fjalë të mëdha për “kapje institucionesh” dhe poza viktimash. Por faktet janë kokëforta. PD e bëri punën e saj për pushtetin dhe më pas u largua për të shpëtuar fytyrën.
Kjo nuk është opozitë. Kjo është hipokrizi politike.
Demokratët nuk kanë nevojë për opozitë që firmos në prapaskenë dhe bërtet në kamera. Ata presin qëndrime të qarta, jo manovra për të larë duart pasi dëmi është bërë.
Zhgënjimi nuk është rastësi, është pasojë
Reagimi i bazës demokrate ishte i menjëhershëm: zhgënjim, zemërim dhe ndjenjë tradhtie. Jo për shkak të një emri të vetëm, por sepse ky episod konfirmoi atë që shumë demokratë e ndiejnë prej kohësh:
PD nuk funksionon më si parti e demokratëve, por si strukturë e një grushti njerëzish.
Vendime të rëndësishme merren nga pak individë, pa transparencë, pa konsultim dhe pa llogaridhënie. Militanti përdoret si dekor elektoral, ndërsa pushteti i vërtetë mbetet brenda një rrethi të mbyllur.
Nga opozitë në shoqatë familjesh përfituese
Rasti i Shabanit është vetëm një pasqyrë. PD po perceptohet gjithnjë e më shumë si shoqatë familjesh politike, ku:
– postet qarkullojnë mes të njëjtëve mbiemra
– lidhjet personale vlejnë më shumë se parimet
– opozitarizmi sakrifikohet për pazare dhe mbijetesë
Në një parti të tillë, interesi publik humbet dhe opozita shndërrohet në biznes politik.
Demokratët e thjeshtë, ata që votojnë, protestojnë dhe mbrojnë PD-në në terren, janë lënë jashtë loje. Ata nuk pyeten, nuk përfaqësohen dhe në fund paguajnë faturën e pazareve të elitës.
Firmat për Shabanin ishin vijë e kuqe
PD mund të kishte refuzuar. Mund të mos firmoste. Mund të mbante një qëndrim të pastër opozitar. Zgjodhi të mos e bëjë. Dhe ky ishte momenti kur shumë demokratë e kuptuan se përveç pushtetit problemi është edhe opozita.
Një parti që:
firmos me pushtetin
lejon zgjedhjen e kandidatëve të tij
dhe më pas hiqet si kundërshtare
nuk është opozitë. Është pjesë e sistemit që pretendon se lufton.
Nëse kjo vazhdon, PD do mbetet pa demokratë
Zgjedhja e Avokatit të Popullit mbaroi, por kriza e besimit sapo ka filluar. Nëse PD nuk bën një kthesë të vërtetë, nuk ndëshkon politikisht përgjegjësit dhe nuk çlirohet nga logjika e familjeve dhe përfituesve, ajo rrezikon të mbetet një logo pa bazë.
Sepse demokratët mund të durojnë humbje zgjedhjesh.
Por nuk falin tradhtinë politike.
