Presidenti amerikan Donald Trump ka shprehur zhgënjimin e tij ndaj homologut ukrainas Volodymyr Zelensky, duke deklaruar se ky i fundit “nuk është gati të nënshkruajë propozimin amerikan për paqen në Ukrainë”.
Deklaratat e Trump erdhën pas përfundimit të tre ditëve të bisedimeve mes negociatorëve amerikanë dhe atyre ukrainas, të cilat kishin në fokus draftin e planit të Uashingtonit për t’i dhënë fund luftës që zgjat prej afro katër vitesh.
“Jam paksa i zhgënjyer që presidenti Zelensky nuk e ka lexuar ende propozimin. Populli i tij e adhuron, por ai jo,” u shpreh Trump në një takim me gazetarët, duke shtuar se “Rusia, besoj, është dakord me të, por nuk jam i sigurt nëse edhe Zelensky është. Ai nuk është gati”.
Sipas mediave amerikane, Trump po nxit palët që të arrijnë një marrëveshje të shpejtë, ndërsa ka paralajmëruar se Shtetet e Bashkuara nuk mund të financojnë pafundësisht luftën në Ukrainë. Ai ka përsëritur bindjen se “një pjesë e territorit ukrainas mund t’i dorëzohet Moskës” për t’i dhënë fund konfliktit.
Nga ana tjetër, presidenti rus Vladimir Putin ka deklaruar se disa pjesë të planit amerikan “nuk janë funksionale”, megjithëse drafti i parë shihet si më i favorshëm për Moskën.
Ndërkohë, Zelensky ka bërë të ditur se kishte zhvilluar një bisedë “domethënëse” me zyrtarët amerikanë të përfshirë në procesin e negociatave në Florida.
“Ukraina është e vendosur të vijojë bashkëpunimin në mirëbesim me palën amerikane për të arritur paqen,” shkroi ai në rrjetet sociale.
Tensionet mes dy liderëve, që kanë patur marrëdhënie të ndërlikuara që nga nisja e mandatit të dytë të Trump, pritet të ndikojnë edhe në vijimin e procesit të paqes dhe në qëndrimin e Washingtonit ndaj ndihmës për Kievin.
