Vdekja tragjike e Daorsa Spahijës, studentes 24-vjeçare nga Gjakova, e cila humbi jetën më 5 nëntor duke rënë nga një ndërtesë në Tetovë, ka ngritur dyshime për vrasje.
Shoku i saj, Arbër Zhubi, pretendon se Daorsa është shtyrë nga partneri i saj, Hevzi Sejdiu, 31-vjeçar, i cili sipas tij e ka konfirmuar vdekjen dhe më pas ka orkestruar terrenin që ngjarja të konsiderohet vetëvrasje. Zhubi tha se policia e Maqedonisë së Veriut mund ta ketë fshehur të vërtetën.
“Personi pasi ka shtyrë vajzën rreth orës 16:15, ka zbritur poshtë, dhe e ka konfirmuar vdekjen e shoqes sonë, Daorsës, pra personi Hevzi Sejdiu, më pas, kamerat e sigurisë janë rreth pesë ose gjashtë kamera që përfshijnë hyrjet e apartamenteve, garazhe që kanë pamje të jashtme”, deklaroi ai për Klan Kosova.
Sipas tij, Sejdiu ishte i martuar dhe kishte tre fëmijë, fakt që nuk i kishte treguar Daorsës gjatë lidhjes dyvjeçare. Ai është i njohur si person me precedent penal për trafik armësh dhe ishte liruar disa muaj më parë.
Shoku i viktimës tha gjithashtu se Daorsa kishte një gjendje të rënduar mendore për shkak të situatës, ndërsa nuk pati mundësi të kërkonte ndihmë te autoritetet.
Vajza e ish-ushtarit të UÇK-së, Arbër Spahija, u varros më 7 nëntor në Gjakovë. Ngjarja po hetohet, ndërkohë që familjarët dhe shokët kërkojnë zbardhjen e plotë të saj.
