Gjykata e Posaçme kundër Korrupsionit dhe Krimit të Organizuar (GJKKO) ka shpallur vendimin për çështjen penale ndaj Fabion Gjonit, i akuzuar për pjesëmarrje në grup të strukturuar kriminal dhe trafik droge.
Prokuroria e Posaçme kishte paraqitur kërkesën për gjykim të shkurtuar, duke e akuzuar të pandehurin për veprat penale të kultivimit, prodhimit dhe shitjes së lëndëve narkotike, si dhe për pjesëmarrje në grup kriminal, sipas neneve përkatëse të Kodit Penal.
Seanca gjyqësore u zhvillua me trup gjykues të përbërë nga gjyqtaret Etleva Deda, Flojera Davidhi dhe Rudina Palloj. Me vendimin nr. 70, datë 11 nëntor 2025, GJKKO vendosi shpalljen fajtor të Fabion Gjonit për tre vepra penale: kultivim të lëndëve narkotike, prodhim dhe shitje të narkotikëve, si dhe pjesëmarrje në grup të strukturuar kriminal.
Për veprën e kultivimit të lëndëve narkotike, gjykata e dënoi me 8 vite burgim. Për prodhimin dhe shitjen e narkotikëve, dënimi ishte 10 vite burgim, ndërsa për pjesëmarrjen në grup kriminal, 2 vite burgim. Në bazë të nenit 55 të Kodit Penal, dënimet u bashkuan duke rezultuar në një dënim total prej 10 vite burgim.
Megjithatë, duke qenë se gjykimi u zhvillua sipas procedurës së shkurtuar, gjykata aplikoi uljen e një të tretës së dënimit, duke e dënuar përfundimisht Fabion Gjonin me 6 vite e 8 muaj burgim. Vendimi parashikon që ai ta vuajë dënimin në një institucion të sigurisë së lartë për të dënuarit e rritur.
