Në valën e titujve mediatikë mbi raportimin e detajeve të dosjes penale kundër zv/kryeministres së vendit, Belinda Balluku, një lajm tjetër që mbuloi ekranet e TV dhe portalet e vendit ishte edhe kërkesa-padia civile e Neda Stefan Ballukut.
Kjo e fundit është kunata e Belinda Ballukut, pasi 10 vite më parë kurorëzoi martesën me vëllain e Ballukut, Ogren Balluku.
Çështja tashmë është regjistruar në sekretarinë e gjykatës me nr. 17084, ndërsa shorti elektronik i gjykatës ka zgjedhur për gjykimin e kësaj kërkese-padie gjyqtaren Majlinda Dogga.
Mësohet se palët, Neda Balluku dhe Ogren Balluku, kanë rënë dakord duke lidhur një marrëveshje divorcimi mes njëri-tjetrit, duke çuar edhe në ndarjen e detyrimeve që do të rrjedhin nga ky divorc për të dyja palët.
Ky divorc vjen në një periudhë të errët që po kalon familja Balluku, pasi “flamurtarja” e kësaj familje, Belinda Balluku, është marrë e pandehur nga SPAK për akuzën e “shkeljes së pabarazisë në tendera dhe ankande publike”, lidhur me procedurën tenderuese me vlerë 190 milionë euro për ndërtimin e tunelit të Llogarasë.
Ndërsa një çështje tjetër e regjistruar në SPAK është ajo e fshehjes së pasurisë, pastrimit të parave dhe korrupsionit pasiv ndaj funksionarit të lartë publik./Elton Qyno, Syritv
