Presidenti amerikan Donald Trump ka reaguar ashpër pas fitores së Zohran Mamdanit në zgjedhjet për kryebashkiak të Nju Jorkut, duke e quajtur atë “komunist” dhe duke e krahasuar politikën e tij me atë të demokratëve në Kongres.
“Nëse doni të shihni se çfarë duan t’i bëjnë demokratët në Kongres Amerikës, shikoni rezultatet në Nju Jork, ku partia e tyre caktoi një komunist si kryetar bashkie të qytetit më të madh në vend,” deklaroi Trump gjatë fjalës së tij në Forumin Amerikan të Biznesit në Miami.
I pyetur për qëndrimin ndaj Mamdanit, presidenti amerikan tha se po mendon të largohet nga Nju Jorku për shkak të politikave të tij:
“Unë jetoj në Nju Jork, por po përpiqem të largohem, nuk dua të jetoj në një regjim komunist,” tha Trump, duke shtuar me ironi se “Miami do të bëhet një strehë për ata që ikin nga komunizmi në Nju Jork”.
Më herët, Trump kishte deklaruar se kishte mbështetur me gjysmë zemre rivalin e Mamdanit, Andrew Cuomo, vetëm për të shmangur fitoren e kandidatit 34-vjeçar me origjinë myslimane.
Në vijim të deklaratave të tij, presidenti amerikan tha se demokratët po e shtyjnë vendin drejt “ekstremizmit të majtë” dhe se “komunizmi nuk ka funksionuar kurrë askund në histori”.
“Pas rezultateve të mbrëmshme, zgjedhja për amerikanët është e qartë: mes komunizmit dhe logjikës së shëndoshë. Për sa kohë që unë jam në Shtëpinë e Bardhë, Shtetet e Bashkuara nuk do të bëhen kurrë komuniste,” tha Trump.
Ndërkohë, kryebashkiaku i sapozgjedhur Zohran Mamdani ka bërë me dije se nuk është kontaktuar nga Shtëpia e Bardhë për urimet zyrtare, duke refuzuar të komentojë akuzat e presidentit.
