Ish-nënpresidentja e Shteteve të Bashkuara, Kamala Harris, ka lënë të hapur mundësinë për t’u rikthyer në garën për presidencën amerikane. Në një intervistë për BBC, Harris tha se “nuk ka mbaruar ende” me ambiciet e saj politike dhe se është “e mundur” që një ditë të bëhet presidente.
“E gjithë jeta ime ka qenë e përkushtuar ndaj shërbimit publik, dhe kjo është diçka që e kam thellë brenda vetes,” deklaroi ajo, duke dhënë sinjalin më të qartë deri tani se mund të rikthehet në skenën elektorale.
Harris humbi zgjedhjet presidenciale të vitit 2024 përballë Donald Trump, pasi presidenti Joe Biden u tërhoq nga gara vetëm 107 ditë para votimeve. Në librin e saj “107 Ditë”, ish-nënpresidentja kishte lënë të kuptohej se nuk kishte ndërmend të kandidonte sërish, duke theksuar se “ndryshimi i sistemit nga brenda është i pamundur”.
Megjithatë, në intervistën e fundit ajo duket se ka ndryshuar qëndrim. “Mbesat e mia do të shohin patjetër një grua presidente gjatë jetës së tyre,” tha Harris, dhe kur u pyet nëse mund të ishte ajo vetë ajo grua, u përgjigj: “Mundësisht, po.”
E pyetur për sondazhet që e rendisin si kandidate të jashtme në zgjedhjet e ardhshme të Partisë Demokratike, Harris u shpreh me ironi:
“Ka shumë sondazhe që tregojnë çdo lloj rezultati. Nuk i kam marrë kurrë seriozisht. Nëse do t’i besoja atyre, sigurisht që nuk do të isha këtu sot.”
