Zëvendëspresidenti i SHBA-ve, JD Vance, ka mbërritur sot, 21 tetor, në Izrael. Ai ka deklaruar se Shtetet e Bashkuara nuk do të dërgojnë trupa ushtarake në Gaza, duke konfirmuar premtimin e bërë më parë nga Presidenti Donald Trump dhe zyrtarë të tjerë amerikanë.
“Nuk do të ketë ushtarë amerikanë në Gaza. Presidenti i Shteteve të Bashkuara e ka bërë këtë shumë të qartë, dhe të gjithë udhëheqësit tanë ushtarakë e kanë konfirmuar po ashtu“, tha me bindje Vance gjatë një konference për media në Kiryat Gat, në jug të Izraelit, ku një mision i udhëhequr nga SHBA-të po monitoron armëpushimin në Gaza.
Ai shtoi se SHBA-të do të kufizohen vetëm në ofrimin e “koordinimit të dobishëm”.
Vance theksoi gjithashtu se zbatimi i planit të armëpushimit po ecën “më mirë se pritej”, duke lavdëruar bashkëpunimin e Izraelit.
“Qeveria izraelite ka qenë jashtëzakonisht e ndihmshme në zbatimin e planit për Gaza”, u shpreh ai.
Vizita e Zëvendëspresidentit amerikan në Izrael shihet si një shenjë shqetësimi te SHBA-të mbi armëpushimin e brishtë, ndërsa tensionet me Hamas rrezikojnë ta dobësojnë atë.
Negociatat për fazën e dytë të armëpushimit po tregojnë shenja të ngecjes.
Po ashtu, Vance tha se duhet durim lidhur me kthimin e trupave të disa të mbijetuarve dhe të viktimave, duke thënë se vendndodhja e disa trupave të personave të vrarë nuk është ende e njohur dhe se problemi është “i vështirë” dhe nuk mund të zgjidhet brenda natës.
Së fundi, Kryqi i Kuq njoftoi se 15 trupat e palestinezëve janë kthyer në Gaza nga Izraeli, ndërsa Izraeli bëri me dije se trupi i një personi të mbajtur si peng është identifikuar.
Për të forcuar marrëveshjen e armëpushimit në Gaza, Zëvendëspresidenti amerikan pritet të zhvillojë bisedime me Kryeministrin izraelit Benjamin Netanyahu, ndërsa do të qëndrojë në rajon deri të enjten, 23 tetor.
Të dyja palët, Izraeli dhe Hamas, kanë deklaruar se janë të angazhuar ndaj armëpushimit të mbështetur nga SHBA-të, pavarësisht dhunës së regjistruar gjatë fundjavës.
