Kryetarja e Këshillit të Lartë të Prokurorisë (KLP), Mirela Bogdani, ka raportuar këtë të hënë në Komisionin e Ligjeve dhe Nismave Qytetare.
Duke folur për arrestimin e avokatit Ulian Barjami në Elbasan dhe procesin e përzgjedhjes së kreut të SPAK, Bogdani theksoi se KLP ka kërkuar nga Prokuroria e Elbasanit informacion më të detajuar, para se të dalë me një qëndrim publik për ngjarjen.
“Lidhur me avokatin e arrestuar në Elbasan, ne kishim një mbledhje plenare sot që kaluam në kushtet dhe kriteret formale sot dhe për drejtuesin e SPAK-ut dhe e diskutuam në mënyrë informale, vendosëm që do kërkojmë informacion për të komunikuar me drejtuesin e prokurorisë edhe pastaj do vlerësojmë qëndrimin, nuk mund të shprehemi ende.
Informacioni në media ishte i kufizuar dhe nuk mund të dalim me një qëndrim të nxituar. Unë nuk mendoj se duhet të nxitohemi”, tha Mirela Bogdani.
Kujtojmë se avokati Ulian Barjami u arrestua më 18 tetor në Elbasan gjatë një seance gjyqësore, pas një debati me prokurorin për çështjen e klientit të tij, Maksim Lika. Ai u lirua ditën e sotme me urdhër të prokurosië së Elbasanit.
Përsa i përket përzgjedhjes së kreut të Byrosë Kombëtare të Hetimit dhe SPAK, Bogdani sqaroi se roli i KLP është formal dhe vetëm pret propozimin nga SPAK dhe komisioni i posaçëm, që do të çojë deri te emërimi ligjor.
