Këshilltari kryesor ekonomik i Shtëpisë së Bardhë, Kevin Hassett, deklaroi të hënën se mbyllja e pjesshme e qeverisë federale amerikane “ka gjasa të përfundojë gjatë kësaj jave”, por nuk përjashtoi mundësinë që administrata Trump të ndërmarrë masa më të ashpra nëse nuk arrihet një marrëveshje me Kongresin.
Në një intervistë për CNBC, Hassett tha se pritet që demokratët më moderuar të lëvizin drejt një kompromisi që do të mundësonte rihapjen e shërbimeve shtetërore, duke hapur më pas rrugën për negociata të rregullta mbi mosmarrëveshjet politike.
Deklaratat e tij vijnë në javën e tretë të mbylljes së qeverisë, ndërsa përplasjet politike në Senat vazhdojnë për prioritetet e financimit të buxhetit federal.
Republikanët kërkojnë një marrëveshje të përkohshme për të ruajtur nivelin aktual të financimeve, ndërsa demokratët ngulin këmbë që çdo plan të përfshijë fonde shtesë për kujdesin shëndetësor.
Sipas Hassett, disa demokratë në Senat po hezitojnë të votojnë për rihapjen e qeverisë para protestave të mëdha “No Kings”, të planifikuara për fundjavën, që synojnë presidentin Donald Trump. Ai theksoi se kjo konsiderohet si një çështje imazhi politik nga ana e opozitës.
