Gjykata e Gjirokastrës ka lënë në fuqi masën e sigurisë “arrest me burg” për Kamber Sulçaj, i cili u vetëdorëzua tre ditë më parë, pasi akuzohet si autor i vrasjes së biznesmenit italian Edoardo Sarchi, në fshatin Salari të Tepelenës, mbrëmjen e 26 shtatorit.
Vendimi është dhënë nga gjyqtarja Entela Selmanaj, teksa Sulçaj akuzohet për “Vrasja në rrethana të tjera cilësuese”, “Mbajtja pa leje dhe prodhimi i armëve, armëve shpërthyese dhe i municionit”, “Kultivimi i bimëve narkotike”.
Mësohet se gjatë gjithë seancës së sotme, Kamber Sulçaj ka zgjedhur të heshtë para togave të zeza, teksa nuk foli as në momentin kur u dorëzua para Policisë.
Avokati i tij i ardhur nga Vlora, Arsen Zotaj, i ka kërkuar trupit gjykues të merret parasysh fakti i vetëdorëzimit, që do të sillte rrethana lehtësuese për klientin e tij. Pas dhënies së vendimit, ai ka paralajmëruar se do ta ankimojnë masën e sigurisë në Gjykatën e Apelit. Ndërkohë, nuk ka pranuar të flasë për mediat, pas daljes nga gjykata.
Biznesmeni italian, 44-vjeçari Edoardo Sarchi u gjet pa shenja jete, rreth orës 00:30, të mesnatës , në anë të rrugës në vendin e quajtur Dilan mes Nivicës dhe Salarisë, në Tepelenë.
Në trupin e viktimës, është konstatuar vetëm një plagë plumbi, në pjesën e këmbës, në arterien kryesore, ku gjakderdhja dyshohet se i ka shkaktuar vdekjen. Ai ndodhej për gjueti së bashku me Eqerem Braçin dhe dy djemtë e tij, Daniel dhe Gazmend Braçi, si dhe me një person të katërt.
Shkaku i vrasjes dyshohet se ka qenë një mosmarrëveshje momentale për dritat e makinës mes 4 personave, teksa dyshohet se biznesmeni italian është vrarë nga një plumb rikoshet.
Kamber Sulçaj, 48 vjeç, rezulton të jetë aksioner në një gurore në Brataj të Selenicës, Vlorë. Sipas të dhënave zyrtare, Sulçaj zotëron 25% të aksioneve në guroret “Stone Quramenga”, ku aksionarë janë gjithashtu babai i tij, Delo Sulçaj me 20% dhe vëllai, Akil (alias Ermal) Sulçaj me 15%. Pjesa tjetër u përket dy ortakëve të tjerë jashtë familjes. Përveç këtij aktiviteti, Kamber Sulçaj zotëron edhe një stan me bagëti.
Familja Sulçaj nuk është e panjohur për drejtësinë. Në maj të vitit 2021, në Vlorë u arrestua vëllai i tij, Gazmendi, së bashku me kushëririn Roel Sulçaj. Ata u kapën me 2,632 fara kanabisi, të destinuara për kultivim dhe shitje.
