Nëndetësja Titan e kompanisë OceanGate, e cila u shkatërrua gjatë një misioni për të arritur tek rrënojat e Titanikut, pësoi një shpërthim të brendshëm si pasojë e projektimit të dobët dhe mungesës së theksuar të kontrolleve të sigurisë, kështu thuhet në një raport zyrtar të autoriteteve amerikane.
Ngjarja tragjike ndodhi në qershor të vitit 2023, në pjesën veriore të Atlantikut, dhe i mori jetën të pesë personave në bord, përfshirë edhe drejtorin ekzekutiv të OceanGate, Stockton Rush.
Sipas hetimeve të Agjencisë Kombëtare të Sigurisë së Transportit të SHBA (NTSB), projektimi inxhinierik i mjetit ishte “i pamjaftueshëm”, çka çoi në gabime të rënda ndërtimore dhe në paaftësinë e Titan-it për të përballuar kushtet ekstreme të presionit në thellësi.
Raporti thekson gjithashtu se kompania nuk kishte kryer testimet e domosdoshme, duke mos qenë në dijeni të kufijve realë të qëndrueshmërisë së mjetit. Për më tepër, Titan dyshohet se kishte pësuar dëmtime të mëparshme, dhe nuk duhej të ishte përdorur sërish pa u riparuar plotësisht.
Nëndetësja u zhduk në Oqeanin Atlantik Verior, ndërsa ishte në përpjekje për të arritur në vendin ku ndodhen rrënojat e anijes Titanik.
Në muajin gusht, Roja Bregdetare Amerikane publikoi raportin e saj, duke e cilësuar ngjarjen si një aksident plotësisht të evitueshëm, dhe duke kritikuar ashpër praktikat e pasigurta të OceanGate, të cilat i quajti “thellësisht të gabuara”
